Техас вице-губернатори Ден Патрик АҚШ президенти Жо Байден ва унинг маъмуриятини миграция масаласида Техас хавфсизлик кучлари билан зиддиятга бормасликка чақирди. У давлат раҳбарини ҳуқуқ-тартибот идоралари “ўз вазифасини бажариши” учун уларнинг ишига халал бермасликка чақирди.
“Байден маъмурияти қилиши мумкин бўлган энг катта хато бу ҳуқуқ-тартибот идоралари, ҳарбийларимиз ва чегарамиздаги Миллий гвардиямиз билан зиддиятга боришдир. Биз қарама-қаршиликни хоҳламаймиз, биз Америка халқи хоҳлаган нарсага эътибор қаратганмиз. Агар Жо Байден четга ўтиб турса, биз ўз ишимизни қиламиз ва чегарани ҳимоя қиламиз”, — деди Патрик Fox News телеканалига берган интервьюсида.
Унинг таъкидлашича, ноқонуний мигрантларга қарши кураш Техас раҳбариятининг конституциявий ваколати ҳисобланади.
2023 йилда АҚШ чегарасини ноқонуний кесиб ўтишга уринган мигрантлар сони рекорд даражага етди. Ўтган йилнинг декабрь ойи охирида Тhе Washington Examiner газетаси чегара хизматидаги манбаларига таяниб, бир суткада давлат чегарасини кесиб ўтишга 14,5 минг уриниш қайд этилгани ҳақида хабар берган эди.
Техас расмийларининг айтишича, ноқонуний иммиграция даражасининг ошиши Жо Байденнинг “очиқ чегаралар сиёсати” туфайлидир.
Хусусан, 22 январь куни АҚШ Олий суди Техас миллий гвардияси Мексика билан чегарада ўрнатган сим тўсиқларни олиб ташлаш тўғрисида қарор чиқарди. АҚШ маъмуриятининг таъкидлашича, тўсиқлар федерал чегара хизматига мигрантларни ҳибсга олиш ва уларга қонун талабига кўра керак бўлганда ёрдам кўрсатишга тўсқинлик қилмоқда.
Изоҳ (0)