Ўзбекистонда 1 апрелдан бошлаб чиқиндиларни тўплаш ва олиб чиқиб кетиш хизматлари учун нол даражали ставка бўйича солиқ солиниши бекор қилинади. Бу ҳақда Санитар тозалаш ишларини ташкил этиш республика маркази хабар берди.
Қайд этилишича, бу солиқ ва бюджет сиёсатининг 2024 йилга мўлжалланган асосий йўналишларидан бири ҳисобланади. Мазкур тартиб жорий этилишига масъул бўлган Солиқ органининг тушунтиришига кўра, энди хизмат кўрсатувчи корхона томонидан кўрсатиладиган санитар тозалаш хизматлари қийматига нисбатан қўшилган қиймат солиғи ҳисобланади. Мазкур ўзгартириш аҳоли ва тадбиркорлар учун ҳам амал қилади.
Яъни масалан, амалдаги хизмат қиймати 4000 сўмни ташкил этса, ушбу қийматга нисбатан 1 апрелдан бошлаб 12 фоиз миқдорда ҚҚС ҳисобланганда, жами хизмат қиймати 4480 сўмни ташкил этади.
Ноябрь ойида Тошкент шаҳридаги аҳоли ва ташкилотлар учун чиқинди тўплаш ва олиб чиқиб кетиш хизмати нархи 7500 сўмга оширилганди. Шунингдек, Ўзбекистонда чиқиндилар бўйича кўрсатилган хизматлардан қарздорлар свет учун пул тўлолмаслиги тўғрисида хабар берилган эди.
Изоҳ (0)