Дональд Трамп Нью-Хемпширда Республикачилар партиясининг праймеризларида ғалаба қозонди, Жо Байден эса демократ сайловчилардан кўпчиликнинг овозини олди. Бу ҳақда New York Times AP агентлигига таяниб хабар берди. Агентлик таҳлилчилари биринчи сайлов участкаларида овоз бериш натижалари эълон қилинганидан кўп ўтмай, Трампнинг ғалабаси муқаррар, деб ҳисоблашганди.
198 мингта бюллетеннинг санаб чиқилиши натижаларига кўра, республикачилар орасида Трамп етакчилик қилмоқда – у 54,0 фоиз овоз тўплаган. Номзодлик учун курашда республикачилардан унинг фақат битта рақиби қолганди — АҚШнинг БМТдаги собиқ элчиси Никки Хейли; Унга Нью-Хемпширдаги республикачиларнинг 44,5 фоизи овоз берди.
Жо Байденнинг исми сайлов бюллетенига киритилмаган, бунга штат ҳукумати ва Демократик партия ўртасидаги зиддият сабаб бўлган. Шунга қарамай 63 минг сайловчидан 70 фоизга яқини унинг исмини бюллетенга қўлда ёзган. Конгрессмен Дин Филлипс 20,9 фоиз, ёзувчи Мариан Уильямсон эса 4,3 фоиз овоз олди.
Дональд Трамп 2023 йилда тўртта жиноий иш бўйича айбланган. Суд жараёнларининг биринчиси 4 март куни бошланиши режалаштирилган, бироқ ҳимоячиларнинг шикоятлари туфайли кечиктирилиши мумкин. Трамп айбдор деб топилиб, қамоқ жазосига ҳукм қилинган тақдирда ҳам, сайловда қатнашиши мумкин бўлади.
АҚШда президентлик сайловлари 2024 йил 5 ноябрда бўлиб ўтади.
Изоҳ (0)