Шимолий Кореяда икки ўсмир Жанубий Корея фильмларини томоша қилгани учун омма олдида 12 йиллик оғир меҳнатга ҳукм қилинди. Бу ҳақда BBC хабар бермоқда ва болаларнинг суд жараёни акс этган кадрларни эълон қилди.
2022 йилда олингани тахмин қилинаётган кадрларда очиқ стадионда юзлаб ўқувчилар кўз ўнгида қўллари кишанланган икки йигит тасвирланган. Форма кийган офицерлар уларни “ўз хатоларини тушунмагани” учун қоралайди.
Нашрнинг қайд этишича, КХДРда Жанубий Кореянинг кўнгилочар дастурлари, жумладан, телевидениеси ҳам тақиқланган.
Бундай кадрлар кам учрайди, чунки Шимолий Корея мамлакатдаги ҳаётни акс эттирувчи фотосуратлар, видеолар ва бошқа далилларни сиздиришни тақиқлайди. Ушбу видео BBC’га Шимолий Кореядан қочганлар билан ишлайдиган Жанубий ва Шимолий тараққиёт тадқиқот институти томонидан тақдим этилган.
Маълумотларга кўра, ролик Шимолий Кореяда мафкуравий тарбия ва фуқароларни Жанубий Кореядан кўнгилочар дастурларни томоша қилмасликдан огоҳлантириш мақсадида тарқатилган.
Видеода диктор ҳукумат ташвиқотини такрорлаётгани акс этган.
“Чириган қўғирчоқ режим маданияти ҳатто ўсмирларга ҳам тарқалди. Улар эндигина 16 ёшда, аммо келажагини барбод қилди”, — дейди видеодаги овоз.
Нашрнинг ёзишича, авваллари шундай йўл билан қонун бузган вояга етмаганлар панжара ортида эмас, балки ёшлар меҳнат лагерларига жўнатилган ва жазо одатда беш йилдан кам бўлган. Бироқ 2020 йилда Пхеньян Жанубий Кореянинг кўнгилочар фильмларини қайта кўриб чиқиш ёки тарқатиш ўлим билан жазоланиши мумкин бўлган қонунни қабул қилди.
Изоҳ (0)