Microsoft компанияси Midnight Blizzard гуруҳи (Nobelium номи билан ҳам танилган) хакерлари Microsoft раҳбарлари, киберхавфсизлик ходимлари, юридик ва бошқа бўлимларнинг электрон почта аккаунтларини бузиб кирганини хабар қилди.
Microsoft блогида айтилишича, ҳужум 12 январь куни аниқланган. Корпорация хакерликни “давлат ҳужуми” деб атади ва Midnight Blizzard хакерларига Россия ҳукумати ҳомийлик қилганини даъво қилди.
Компания маълумотларига кўра, хакерлар 2023 йилнинг ноябрида “Microsoft корпоратив электрон почта аккаунтларининг кичик қисмига” киришга муваффақ бўлган. Улар электрон почта хабарлари ва уларга бириктирилган ҳужжатларни ўғирлаган. Microsoft суриштируви шуни кўрсатдики, хакерлар электрон почта хабарларида Midnight Blizzard’га алоқадор маълумотларни қидирган.
Компаниянинг қайд этишича, ҳужум сабаби корпорация маҳсулотлари ёки сервисларининг заифлиги эмас. Microsoft маълумотларига кўра, хакерлар фойдаланувчиларга мўлжалланган сервислар, манба кодлари ёки сунъий интеллект тизимларига кира олгани ҳақида ҳеч қандай далил йўқ.
Microsoft аввал ҳам Midnight Blizzard (ёки Nobelium) хакерларининг ҳужумлари ҳақида хабар берганди. Компания гуруҳ аъзоларини Россия ташқи разведка хизмати билан боғлаган. Microsoft 2021 йилнинг тўрт ойида Nobelium хакерлари технология компанияларига 22,8 мингдан ортиқ киберҳужум уюштирганини маълум қилди.
Изоҳ (0)