Франция мудофаа вазири Себастьян Лекорню Украинадаги француз ёлланма аскарлари ҳақидаги баёнотни “Россия ахборот урушининг бир қисми” деб атади. Шу билан бирга, у Франция фуқаролари Киев томонида жанг қилаётганини тан олди.
“Украина ҳарбий кийимида Украинада жангга кирган француз фуқаролари бор. Биз уларни тақиқлай олмаймиз, чунки демократик давлатмиз. Бу одамларнинг Франция Қуролли кучлари билан ҳеч қандай алоқаси йўқ, улар француз ҳарбий формасини киймаган ва француз ҳарбий муассасаларига алоқадор эмас”, — деди Лекорню LCI телеканалига.
Вазир Украинанинг Россия ҳудудига берган зарбаларига ҳам муносабат билдирди. Унинг сўзларига кўра, Париж ҳар қандай тинч аҳоли қурбонларини фожиа деб билади, жумладан, Россия томонидаги қурбонларни ҳам.
Лекорнюнинг айтишича, Франция Украинага ҳарбий ёрдам беришда давом этмоқчи. Париж артиллерия, ҳаво мудофааси, “технология ва инновациялар” билан ёрдам беради ва Россия позицияларига “чуқур зарбалар”ни қўллаб-қувватлайди. Қўмондонлик пунктлари, таъминот занжирлари ва ўқ-дори омборларини йўқ қилиш учун Франция Украина Қуролли кучларини ойига 50 та ААSМ бомбаси билан таъминлайди. Шу билан бирга, вазир Франция Россия билан уруш ҳолатида эмаслигини айтди.
Аввалроқ Россия Мудофаа вазирлиги рус армияси Харьковга зарба бергани, оқибатда хорижлик ёлланма аскарлар, асосан французлар жойлашган бино вайрон қилингани ҳақида хабар берганди. Ҳужум оқибатида 60 киши ҳалок бўлгани, 20 га яқин одам яралангани айтилмоқда. 19 январь куни Франциянинг Москвадаги элчиси Пьер Леви Россия Ташқи ишлар вазирлигига чақирилди. Вазирлик маълумотларига кўра, йиғилишда унга “Украинадаги можарога Парижнинг жалб этилаётгани” фактлари тақдим этилган.
Изоҳ (0)