Исроил ва ҲАМАС Қатар Ташқи ишлар вазирлиги ва Франция воситачилигида гуманитар ёрдам етказилишига келишиб олди.
ҲАМАС исроиллик гаровга олинганларга зарур дори-дармонлар етказиб берилишига рози бўлди. Гаровга олинганлар учун дори-дармонлар эвазига Ғазо секторидаги жабрланган ҳудудлардаги тинч аҳолига инсонпарварлик ёрдами ва дори-дармонлар юборилади.
Қатар ТИВ расмий вакили доктор Мажед бин Муҳаммад Ал-Ансорийнинг аниқлик киритишича, гуманитар ёрдам 17 январь куни Доҳадан Мисрга иккита ҳарбий самолёт орқали жўнатилади ва у ердан Ғазо секторига етказилади.
Исроил бош вазири Биньямин Нетаньяхунинг идораси 12 январь куни гаровга олинганларга дори-дармонларни топшириш бўйича дастлабки келишувга эришилганини айтганди. Дори-дармонлар “кейинги бир неча кун ичида” етказиб берилиши керак. Препаратлар рўйхати гаровга олинганларнинг оила аъзолари ва уларни даволовчи шифокорлар томонидан тузилган. Қизил хоч уларни етказиб бериши керак.
Франция ҳам Қатар билан келишув бўйича ишлаган. Мамлакат президенти Эммануэл Макрон Франция Ташқи ишлар вазирлигига гаровга олинган 45 киши учун дори-дармонлар рўйхатини тузишни топширган. 13 январь, шанба куни Қатарга дори-дармонлар юборилган.
Изоҳ (0)