АҚШ Конгресси Вакиллар палатасининг Ташқи алоқалар қўмитаси раҳбари Майкл Маккол Аҳмад Масъудга “Толибон” ҳукуматини ағдаришда ёрдам бермоқчи, деб ёзди Aamaj News.
Маккол “Толибон” ҳукуматини ағдариш учун Афғонистоннинг “шимолий етакчилари”, жумладан, қаршилик фронти етакчиси Аҳмад Масъуд билан гаплашмоқчи эканини айтган.
“Толибон”нинг хатти-ҳаракатларини ўзгартиришга уриниб кўришимиз мумкин, аммо биз уларга пора беришни хоҳламаймиз, мен Афғонистон шимолидаги фаол ва тирик етакчилар билан гаплашмоқчиман, — деб қўшимча қилди у.
Макколнинг таъкидлашича, Қўшма Штатлар Афғонистон Ғарб дунёси учун хавф туғдирмаслигини таъминлашни истайди ва бу мақсадга эришиш учун барча имкониятлар ишга солинади.
“Толибон” режими имкон қадар тезроқ йўқ бўлиб кетишини хоҳлайман. Улар яхши одамлар эмас, Афғонистон халқи яхши ва меҳрибон халқ, уларнинг кўпчилиги “Толибон”нинг шафқатсиз ҳукмронлиги остида яшашга мажбур бўлаётгани ачинарли, — деди америкалик расмий.
Бошқа тарафдан АҚШ Конгресси Вакиллар палатасининг Ташқи алоқалар қўмитаси раҳбари Афғонистонда аёллар ҳуқуқларини таъминлашга чақирди.
Афғонистонда “Толибон” ҳокимиятга келганидан сўнг, толиблар ҳукуматига қарши иккита ҳарбий фронт — Озодлик фронти ва Миллий қаршилик фронти иш олиб бормоқда, охирги пайтларда уларнинг ҳужуми кучайган.
Шу билан бирга, Афғонистон Миллий қаршилик фронти АҚШ Конгресси Вакиллар палатаси Ташқи алоқалар қўмитаси раисининг “Толибон”га қарши бўлган демократик кучлар билан мулоқотга доир баёнотларини олқишлади.
“Биз Афғонистоннинг халқаро ҳамжамиятдаги дўстлари, хусусан, АҚШ билан алоқаларимизни мустаҳкамлашдан манфаатдормиз”, — деди Қаршилик фронтининг ташқи алоқалар бўйича ходими Майсам Назарий.
Изоҳ (0)