Америкалик амалдор Байден ҳукумати “Толибон”ни террорчилар рўйхатидан чиқаришга уринаётганини айтди

Америка “Толибон”ни террорчи гуруҳлар рўйхатидан чиқаришга ҳаракат қилмоқда, деб хабар берди Ааmaj News.

АҚШ Конгресси Вакиллар палатаси ташқи алоқалар қўмитаси раиси Майкл Маккол “Толибон” террорчи гуруҳ бўлса-да, Жо Байден ҳукумати бу ҳаракатни террорчи гуруҳлар рўйхатидан чиқаришга ҳаракат қилаётганини айтди.

“Кўриниб турибдики, Байден ҳукумати ‘дўстлик’ орқали ‘Толибон’ сиёсатини ўзгартирмоқчи, аммо толибларнинг хатти-ҳаракати кундан кунга ёмонлашмоқда”, — деди Маккол Афғонистон бўйича йиғилишда. 

У мамлакатнинг Афғонистондаги 20 йиллик саъй-ҳаракатлари барбод бўлганини таъкидлади. АҚШнинг Афғонистонга нисбатан сиёсатини танқид қилган Маккол Байден ҳукуматининг Афғонистон халқига нисбатан ҳеч қандай режаси йўқлигини айтди. У “Толибон” ҳукмронлиги остидаги Афғонистонда аёлларга эркакcиз уйдан чиқиш тақиқлангани, қизлар таълим олишдан маҳрум этилганини эслатди.

Йиғилишда Маккол “Толибон” “Ал-Қоида”га бошпана бераётгани, АҚШ Афғонистонда қолдирган қурол ва жиҳозлар ҳозир террорчи гуруҳларга сотилаётганини даъво қилди.
Унинг айтишича, “Толибон” ички ишлар вазири Сиражуддин Ҳаққоний “Ал-Қоида”нинг собиқ раҳбари Айман аз-Завоҳирийга бошпана берган.

АҚШ ташқи алоқалар қўмитаси раҳбари Байден ҳукуматидан Афғонистонга нисбатан сиёсатини ўзгартиришни сўради. Унинг айтишича, Америка “Толибон”га эмас, Афғонистон халқига ёрдам бериши керак.

Майкл Маккол, шунингдек, Хитойнинг Афғонистондаги таъсиридан хавотир билдирди.