АҚШ мудофаа вазири Ллойд Остин простата саратонидан даволанмоқда, деб хабар берди CNN телеканали Уолтер Рид миллий ҳарбий тиббиёт маркази баёнотига таяниб.
Баёнотда ойдинлик киритилишича, Остинга декабрь ойи бошида простата саратони ташхиси қўйилган, 22 декабрь куни у простатектомия деб номланган “минимал инвазив жарроҳлик муолажасини” ўтказган. Шифокорларнинг айтишича, Остин умумий наркоз остида бўлган ва эртаси куни эрталаб уйига қайтган.
Шифокорларнинг баёнотига кўра, простата саратони Пентагон раҳбарида эрта босқичда аниқланган, улар Остиннинг тузалиб кетиш истиқболлари “аъло даражада” эканини айтди.
CNN таъкидлаганидек, Остиннинг касалхонага ётқизилгани ҳақидаги аввалги хабарларда унинг операция вақтида наркоз остида бўлгани айтилмаганди.
1 январь куни кечқурун Пентагон раҳбари яна касалхонага тушди. Тўрт кун давомида на унинг ўринбосари, на Оқ уй, на АҚШ президенти Жо Байден бу ҳақда билган.
Остиннинг касалхонага ётқизилгани ҳақидаги маълумотлар фақат 5 январь куни, Пентагон вазир режалаштирилган операциядан сўнг асоратлар билан касалхонада ётгани, аммо аллақачон тузалиб кетгани ва тез орада ўз вазифаларини бажаришга киришиши ҳақида хабар тарқатганидан кейин оммага маълум бўлди. Остиннинг ўзи 6 январь куни уни шифохонада даволаган шифокорларга миннатдорлик билдирди, оммавий ахборот воситаларининг “шаффофлик борасидаги хавотирларини” тушунишини айтди.
Республикачилар Остинни истеъфога чиқишга чақирди
Остиннинг касаллиги билан боғлиқ бир неча кунлик ноаниқлик мухолифатдаги республикачиларнинг кескин танқидига сабаб бўлди. Бир қатор сиёсатчилар мудофаа вазири истеъфосини талаб қилмоқда. Улар Россиянинг Украинадаги уруши ва Яқин Шарқдаги кескин вазият ҳолатида идора бошлиғининг йўқлигида Пентагонни ким бошқараётганини тушунмаяпти.
Қўшма Штатларда жамоатчилик юқори лавозимли сиёсатчиларнинг соғлиғи ҳақида тўлиқ маълумот олиши одат тусига кирган.
Ллойд Остин 2021 йилда ваколат муддати бошланганидан буён Байден жамоаси аъзоси. У Пентагонга раҳбарлик қилаётган биринчи афроамерикалик бўлди. 2016 йилгача АҚШнинг амалдаги мудофаа вазири Яқин Шарқда жойлашган АҚШ кучлари қўмондони бўлган. Бу лавозимда у АҚШнинг Ироқ, Сурия ва Афғонистондаги миссиялари учун масъул эди. АҚШ армиясидаги 40 йилдан ортиқ фаолиятининг бошида Остин Германияда хизмат қилган.
Изоҳ (0)