Ҳиндистонда сунъий интеллект стартапининг бош директори Сучана Сетҳ Гоа штатида тўрт ёшли ўғлини ўлдирганликда айбланиб ҳибсга олинди, деб ёзмоқда Hindustan Times.
Бангалорда яшовчи Сетҳ 7 январь куни Карнатака штатида полиция томонидан ҳибсга олинган. Суд уни олти суткага ҳибсда қолдирди. Полиция маълумотларига кўра, 39 ёшли тадбиркор аёл Шимолий Гоадаги меҳмонхонада ўз ўғлини ўлдирган, сўнгра жасад билан таксида Бангалорга қочиб кетган.
Сетҳ ва унинг боласи меҳмонхонага 6 январь куни жойлашган. Хонани тозалаш билан шуғулланган меҳмонхона ходими текширувдан сўнг қон доғларини пайқаб қолган ва меҳмонхона раҳбарияти бу ҳақда полицияга хабар берган. Аёл меҳмонхонадан чиқишдан олдин унга такси чақириб беришларини сўраган.
Полиция унга қўнғироқ қилиб, қон излари ва ўғли ҳақида сўрайди. Сетҳ доғларни ҳайз билан боғлади, боласи эса Маргао шаҳридаги дугонаси билан бирга эканини айтади. Бироқ унинг полицияга берган манзили ёлғон бўлиб чиқди. Натижада тадбиркор аёл қўлга олинди. Полиция ходимлари унинг сумкасини текшириб, ичидан боланинг жасадини топган.
Сетҳ сўроқ пайтида эридан алоҳида яшаши ва ҳозир ажрашиш жараёни кўриб чиқилаётганини айтди. Аёлнинг сўзларига кўра, у ўғли устидан васийлик масаласи бўйича келишмовчиликдан хафа бўлган. Унинг эри ҳозир Жакартада ва воқеа ҳақида хабардор қилинган.
LinkedIn’даги саҳифасига кўра, Сетҳ Mindful AI Lab бош директори ва сунъий интеллект этикаси бўйича мутахассис. У “2021 йилда сунъий интеллект этикаси бўйича 100 та энг яхши аёллардан бири” бўлганди, дейилади нашр хабарида.
Изоҳ (0)