Фармацевтика агентлигининг “Док-1 Макс” сиропи бўйича судланаётган собиқ раҳбари С.К. суднинг 10 январь куни давом этган навбатдаги мажлисида тергов жараёнлари ҳақида гапириб берди.
24 январда (2023 йилнинг январь ойи — таҳр. изоҳи) кафеда ўтирганимда 3 та мелиса видеокамералар билан келиб, томоша кўрсатди. “Мана коррупционэрни ушладик, доричиларнинг каттасини ушладик” деб, ваҳима билан ОАВда кўрсатиб, олиб кетишди. Чақирув қоғозида гувоҳ сифатида келиб-кетишингизни сўраймиз, деб хат тақдим қилишганди. Ўша асосида телефон қилишса ҳам бораверардим. Ҳеч қаёққа қочиб кетадиган жойим йўқ эди. Йўқ, томоша кўрсатишлари керак эди. Мени интернетда ёмонлаб қўйишган-ку, раҳбариятга ёмонлаб қўйишган. “Бу ярамас, мана бу ишларни қилиб қўйган”, деб. Шунинг учун томоша кўрсатиб, қамаши керак эди — бошқа иложи йўқ эди. Хўп, олиб бориб қамашди, адвокат чақиришди. Адвокат олдида “Айтинг-чи, сиз бу нарсани қилдингизми? Айтинг-чи, сиз бу топшириқни бердингизми”, “Йўқ, унақа эди, бунақа эди. Али эди, Вали эди”, “Бўлди, раҳмат, мана бунга қўл қўйиб беринг. Бўлди, камерани ўчиринг, адвокат сизга раҳмат, соғ бўлинг. Кариевни олиб қоламиз, тергов ҳаракатлари давом этади”, дейишди.
Судланувчининг қўшимча қилишича, терговда у қамалсагина, халқ тинчланиши ҳақида айтилган.
“Сен раҳбарсан, сенинг айбинг шунда. Биз каттароқ одамни қамашимиз керак. Халқнинг кўзи қонга тўлган, оилалар боласиз қолиб кетган. Битта лаборатория ходими хато қилиб қўйгани ҳеч кимни қизиқтирмайди. Именно Кариев Сардор Ҳикматович, агентлик директори, мана сени қамашимиз керак, ўшанда халқ тинчийди” дейишди. “Мен ҳам шу халқнинг вакилиман, қизиқ экансизлар-ку. Ўзбек халқи тушунтирсанг тушунади-ку” дедим, — дейди у.
Айбланувчи охирги умиди одил суддан эканини билдирди.
“Ҳурматли судья, охирги умидим суддан. Ҳуқуқий давлатдан яшаяпмиз деб ўйлайман. Майли энди, терговнинг ўз қарашлари бор. Бир йилдан бери қамоқда ўтирибман. Умидим одил суддан”, — деди.
Судланувчининг мазкур кўрсатмаларини тинглаган судья ҳолат суд томонидан ҳолат ўрганиб чиқилиши кераклигини, суд мажбурий текширув ўтказиши лозимлигини таъкидлади.
Ҳурматли суд, бир йилдан кейин қандай экспертиза қиласиз, мен уни билмайман. Лекин бу бўйича ўша заҳоти адвокатларимга айтганман. Улар бу бўйича муносабат билдирган. Терговга хат ёзилган, изолятор раҳбарига хат ёзилган. Менга жисмоний тазйиқлар ўтказилаётганини айтганман. Бундан кейин изолятор дўхтири қабул қилган. Иккита савол бериб, ташхис қўйиб қўйган. “Сенга ҳеч нарса қилмайди, бўлди, боравер”, деган. Орадан бир йил ўтди. Жароҳат излари йўқ ҳозир, — деди у.
Изоҳ (0)