“Док-1 Макс” судида расмийлар, хусусан, давлат айбловчиси Ўзбекистонда мазкур сиропдан вафот этган болалар сони 68 нафар эканини маълум қилиб, дастлаб Олий суд томонидан эълон қилинган рақамлар ўзгарганини тасдиқлади. Бу ҳақда суд мажлисида қатнашаётган “Дарё” журналисти хабар берди.
Суднинг бугун, 10 январь куни давом этаётган навбатдаги мажлисида 23 нафар судланувчиларнинг шахсига аниқлик киритилиб, уларнинг ҳуқуқ ва мажбуриятлари ҳақида тушунтирилган.
“Док-1 Макс” иши бўйича давом этаётган суднинг бундан аввалги мажлисида мавжуд жиноят ишига янги жиноят иши қўшилиб, битта иш юритувига бириктирилгани, ҳолат юзасидан 17 нафар шахсга нисбатан жиноят иши қўзғатилгани хабар берилганди.
Суд мажлисида айбловни ўқиб эшиттирган прокурорга кўра, сиропдан вафот этган болалар сони 68 нафарга етиб, дастлаб Олий суд томонидан эълон қилинган рақамлар ўзгарган.
Сироп бўйича бўлиб ўтган суд мажлисларининг бирида Самарқанд вилояти Болалар кўп тармоқли тиббиёт маркази Маматқул Азизов сиропдан вафот этганлар 66 нафар эканини, вафот этган болалар рўйхатидан тушиб қолган яна бир марҳум бола борлигини очиқлаганди.
Тергов эълон қилган қўшимча жиноят ишида ёзилишича, “Док-1 Макс” сиропидан яна 16 нафар бола оғир, 2 нафари эса енгил тан жароҳати олган.
Изоҳ (0)