Ўзини ўзи республика деб эълон қилган Луганск Халқ Республикасидаги Рубежное шаҳрига Россия самолётидан авиабомба тушиб кетди. ЛХРнинг Россия томонидан тайинланган раҳбари Леонид Пасечник таъкидлашича, “FAB-250” ўқ-дориларининг “фавқулодда қулаши” Россия Аэрокосмик кучлари самолёти жанговар топшириқларни бажараётган вақтда содир бўлган.
Ҳеч ким жабрланмади, деди Пасечник. Яқин атрофдаги уйлар аҳолиси эвакуация қилинган. Вақтинчалик жойлаштириш пунктида беш киши, жумладан, икки бола бор.
Бомба қулаган жойда Ички ишлар, Фавқулодда вазиятлар вазирликлари ва ҳарбий комендатура вакиллари ишламоқда. Мутахассислар ўқ-дориларни зарарсизлантириш тўғрисида қарор қабул қилмоқда.
Россия Мудофаа вазирлиги Рубежноега авиабомба ташлаб юборилиши ҳақида изоҳ бермади.
Бу январь ойи бошидан бери Россия назорати остидаги ҳудудларга рус самолётларидан ўқ-дорилар тушиб кетиши билан боғлиқ иккинчи ҳолат. 2 январь куни эрталаб Воронеж вилоятининг Петропавловка қишлоғида Россия Аэрокосмик кучлари самолётидан авиация ўқ-дорилари тушиб кетди. 100 дан ортиқ уй зарар кўрган, тўрт киши жароҳатланган.
Изоҳ (0)