“Ўғлим Зиннурахонни кўрмай севиб қолган”. Ёрқинхўжа Умаровнинг онаси унинг Озодбек Назарбековнинг қизи билан қандай танишгани ҳақида

Хонанда Зоҳида Умарова “Мирсодиқова билан” YouTube каналига берган интеврюсида ўғли Ёрқинхўжанинг Озодбек Назарбековнинг қизи Зиннура билан қандай танишгани ҳақида сўзлаб берди.



— Ҳеч ким ҳеч кимга совчи бўлмади. Икки ёш бир-бирини Instagram’дан топиб, севишиб қолган. Қизим Ёрқинхўжага “Ўзбекистонда ўз йўналиши билан чиқаётган хонандалардан бирисиз”, деб ёзган ўғлимга. Ёрқинхўжа: “Миллионлаб ёзилган хатлар орасидан шу қизнинг ёзганига эътибор бериб, чиқиб кетаман. Бунча ақлли бу қиз, дейман. Кўрмай севдим бу қизни”, дейди. Болам индамай юравераркан. Мен ундан қачон уйланасан, деб сўрайвераман, у эса индамайди. Қизимиз ёш бўлгани учун индамай юрган экан болам. Зиннурахонни никоҳ кунигача кўрмадик. Ёрқинхўжа ҳам қизимизни ўша куни кўрди. Ёрқинхўжа ҳеч бўлмаса, юзингизни ярмини кўрсам майлими, деса ҳам қизим “Йўқ”, деркан.

Унаштирилганидан сўнг бир куни Ёрқинхўжа келиб қолди. “Аяжон, Зиннурахонни кўрганимда ёқмай қолса-чи?”, деб сўради. Мен шокка тушиб қолдим. “Уни кўрмаганмисан?”, десам “йўқ”, деди. Шундан кейин “Энди нима бўлса ҳам уйланасан. Нимага иккиланяпсан? Онасини қара, қандай чиройли. Кўзлари чарос. 20 ёшида қолиб кетган, умуман қаримаган. У онадан туғилган қиз албатта чиройли бўлади”, дедим. Онасини шунақа севдим. Шунақа ақлли, фаросатли аёл эканки, менга “Зоҳида опа, фарзандларингизни ёлғиз бошингиз билан ўстиргансиз, менга фотиҳа тўйи, унаштирувлар керак эмас. Фақат никоҳ ўқитиб, қизимни ўша куни олиб кетаверинглар”, деди. Бу гаплардан жудаям хурсанд бўлдим.

Зоҳида Умарова, шунингдек, Озодбек Назарбеков билан суҳбати қандай кечгани ҳақида сўзлаб берди.

— Бир куни Озодбек Назарбеков мени суҳбатга чақириб қолдилар. “Тақдир-да, Ёрқинхўжага буюрган экан шу қиз”, дедилар. Ёрқинхўжа билан Зиннуранинг ўртасида жудаям бир буюк муҳаббат бор. Бир-бириларини жудаям севишади. Ўғлимга “Бирор нарсадан асабийлашсанг, қизимга бақириб юборма. Менга бақир, онангман, кўтараман. Лекин қизимни хафа қилиб қўйма”, деб тайинлайман. Зиннура жуда ҳам чаққон. Биз алоҳида яшаймиз. Уларникига келиб қолсам, дарров олдимга югуриб чиқиб, “Ойижон келдингизми?”, деб дарров ош-овқатни тайёрлаб олдимга қўяди.



Маълумот учун, Ёрқинхўжа Умаров ва Зиннуранинг тўйи 2023 йилнинг 19-сентябрьида бўлиб ўтди.