“Вагнер” раҳбари Евгений Пригожиннинг ўлими ортида Россия хавфсизлик кенгаши котиби Николай Патрушев турибди. Бу ҳақда манбаларга таяниб, The Wall Street Journal хабар берди.
Хабарга кўра, Патрушев 2022 йилнинг ёзида Россия президентини “Вагнер” раҳбари хавфи ҳақида огоҳлантиришни бошлаган. Аммо Путин унинг сўзларига қулоқ солмаган, чунки вагнерчилар жанг майдонида муваффақият қозонган. Собиқ россиялик разведка ходимининг сўзларига кўра, бу қараш 2022 йил октябрь ойида ўзгарган.
“Ўшанда Пригожин гўёки Путинга қўнғироқ қилган ва қўпол равишда ўқ-дорилар етишмаслигидан шикоят қилган ва бу катта йўқотишларга олиб келганини айтган. WSJ манбасига кўра, Патрушев ўша пайтда Путиннинг офисида бўлган. Хавфсизлик Кенгаши раҳбари Пригожин хавфли бўлиб қолгани ва Кремлни ҳурмат қилишни тўхтатганини билдирган”, — дейилади хабарда.
Путин Пригожиннинг таъминот ҳақидаги кейинги шикоятларини, шу жумладан Россия ҳарбий раҳбарияти билан оммавий можароларни эътиборсиз қолдирган ва “Вагнер” раҳбарининг қўнғироқларига жавоб бермаган.
“2023 йил июнь ойида Пригожин ўз исёнини бошлаганида, Патрушев назоратни ўз қўлига олди”, — таъкидлайди WSJ.
Манбаларга кўра, Хавфсизлик кенгаши раҳбари Пригожинга ҳамдард бўлган зобитларни чақириб, Пригожинни исённи тўхтатишга ишонтиришни сўраган.
Патрушев, шунингдек, қўшни давлатлардан можароларни ҳал қилиш учун воситачилар қидирган. Беларусь раҳабри Александр Лукашенкодан ташқари (охир-оқибат у воситачи бўлган) бу Қозоғистон президенти Қосим-Жўмарт Тўқаев эди.
“Агар Россия армияси ёлланма аскарларни ушлаб тура олмаса, Қозоғистон қуролли кучлари ёрдам бериши керак эди. Бироқ Тўқаев рад жавобини берган”.
Таъкидланишича, қўзғолон тугагандан сўнг, Патрушев қотиллик режасини ишлаб чиқишни бошлаган. Ғарб разведка идораларидаги манбалар Путинга бу режалар кейинроқ кўрсатилгани ва у эътироз билдирмаганини таъкидлайди.
23 август куни “Вагнер” раҳбари Шереметьево аэропортидан учиб кетишидан олдин унинг самолёти текширилган. Ғарб разведка хизматларидаги WSJ суҳбатдошларига кўра, айнан шу вақтда қанот остига кичик бомба қўйилган.
Парвоздан ярим соат ўтгач, тахминан 8500 метр баландликда бомба портлаган. Самолётдаги ўн кишининг барчаси ҳалок бўлган. Расман, Кремль Пригожиннинг ўлимига алоқадорлигини рад этади.
Изоҳ (0)