Россиялик сиёсатчи Алексей Навальний икки ҳафтадан ортиқ вақт давомида қаерда экани ҳақида расмий маълумот йўқ. Рус мухолифатчиси Кира Ярмиш сиёсатчининг “ғойиб бўлишига” Россия президенти Владимир Путиннинг буйруғи сабаб бўлганини айтмоқда. Бу ҳақда BBC хабар берди.
Мухолифатчи илгари ушлаб турилган Владимир вилоятидаги ИК-6 пунктидан бошқа колонияга кўчирилгани маълум қилинган. Шунингдек, Навальний видео алоқа орқали чиқиши керак бўлган суд мажлисларида ҳам қатнашмаяпти. Кира Ярмиш россиялик сиёсатчининг қаерда эканлиги ҳақидаги ҳар қандай маълумот учун мукофот эълон қилинганини айтди.
“Бизга ишончли маълумот берадиган ҳар бир кишига мукофот ваъда қилдик. Кимдир бизга маълумот бериши мумкинлигига умид қилмоқдамиз. Кўпинча, маҳбусни кўчиришда, бошқа маҳбуслар ҳеч бўлмаганда ниманидир пайқайди. Бунга гувоҳ бўлган айрим қўриқчилар ҳам топилади”, — дейди у.
Ярмишнинг сўзларига кўра, қонуний равишда Россияда маҳбусни бир қамоқхонадан бошқасига ўтказиш учун қанча вақт кетиши мумкинлиги ҳақида ҳеч қандай чекловлар йўқ. Унинг фикрича, Россия ҳукумати президентлик сайловлари арафасида Навальнийни атайлаб изоляция қилмоқда.
“Бу вақт ичида у билан ҳамма нарса юз бериши мумкин. Энди Навальний уни уч йил олдин ўлдирмоқчи бўлган одамларнинг назорати остида. Кремль бу вақт ичида Алексей ҳеч қандай баёнот беришини хоҳламайди. Шунинг учун Алексейни қаергадир олиб кетиш буйруғини Путин берганига аминман”, — дейди Кира Ярмиш.
Эслатиб ўтамиз, Алексей Навальний колонияда жазо ўтаётган вақтда Россиядаги президентлик сайловларда Путиннинг партиясига қарши ҳар қандай номзодга овоз беришни бир неча бор таъкидлаган.
Изоҳ (0)