Чехия пойтахти Прагадаги Карлова университетида 21 декабрь куни отишма содир бўлди. Бу ҳақда BBC хабар берди.
Дастлабки маълумотларга кўра, 10 киши ҳалок бўлган, 30 киши жароҳат олган. Отишма содир этган йигит ўз жонига қасд қилган. Воқеа Карлов университетининг санъат факультети ҳудудида содир бўлгани айтилмоқда. Бу майдон ва унга туташ ҳудуд ўраб олинган. Полиция маҳаллий аҳолини воқеа жойига яқинлашмаслик ва ташқарига чиқмасликка чақирмоқда.
Университет ўқитувчиларидан бири Сергей Медведев воқеага гувоҳ бўлганини айтди.
“Ишониш қийин, лекин биз сокин Прагада отишма остидамиз. Университетда маъруза ўқиётган эдим, бино ичида ўқ овозлари янгради, деразалар силкинди. Кейин жуда кўп қичқириқлар бўлди, аудиторияга махсус хизматлар бостириб кириб, хонани текширди”, — дейди Медведев.
Тахминларга кўра, отишмани Карлова университетининг тарих факультети талабаси Девид Козак очган. Унинг психологик муаммолари борлиги айтилмоқда. Тасдиқланмаган маълумотларга кўра, университетдаги отишмадан сал аввал у отасини ўлдирган.
Карлов университети Чехия Республикасининг асосий университети, Марказий ва Шарқий Европадаги энг қадимги университет ва дунёдаги энг қадимги классик университетлардан бири бўлиб, 1348 йилда Чехия Люксембург қироли Карл IV томонидан асос солинган. Университетда 50 мингдан ортиқ талаба таҳсил олади.
Изоҳ (0)