Ҳиндистоннинг Ғозиобод шаҳрида чой қайнатиш устида келиб чиққан жанжал сабаб эркак ўз хотинини ўлдирди. Бу ҳақда Indiа Today хабар берди.
Маълум қилинишича, ҳодиса 19 декабрь куни содир бўлган, аёл эрталаб соат 6 да уйғонган ва ҳар куни бўлгани каби чой тайёрлай бошлаган. Эр бир неча дақиқадан сўнг уйғониб, чой қачон тайёр бўлишини сўраган.
“Хотини яна 10 дақиқадан кейин чой тайёр бўлишини айтганида унинг жаҳли чиқиб, идишларни улоқтириб юборган”, — дейди полициядаги манба.
Эр-хотин ўртасида жанжал авж олган ва эркак уйда сақланаётган шпага (қиличга ўхшаш қурол) билан хотинининг бўйнига 3-4 марта урган. Кейин эса воқеа жойидан қочиб кетган. Қотиллик ҳақида маълумот олган полиция воқеа жойига етиб келган ва жасадни моргга жўнатган. Кейинчалик аёлнинг ўғли томонидан берилган шикоят асосида жиноий иш қўзғатилган, шундан сўнг эркак ҳибсга олинган.
“Бизга 19 декабрь куни эрталаб соат 08:00 ларда 50 ёшли аёл ўлдирилгани ҳақида хабар келди. Айбланувчи аёлга уйда сақланаётган ўткир қурол билан ҳужум қилган. Аёлнинг ўғли шикояти асосида ҳолат юзасидан тегишли бўлимлар бўйича иш қўзғатилган ва эркак кейинги суд жараёнларигача ҳибсга олинган”, — дейди полициянинг юқори лавозимли амалдори.
Изоҳ (0)