Театр ва кино актрисаси Малика Авазова “Айтилмаган гаплар” кўрсатувига берган интевьюсида севиб оила қургани ва тўрт ярим йил давомида фарзандсизликдан қийналгани ҳақида сўзлаб берди.
— Айрим инсонлар “Ҳаётда 7-12 йиллаб ҳам фарзанд кутиб яшаганлар бор-ку”, дейиши мумкин. Аммо оила қургандан кейин бир ой, бир йилнинг ўтиши қанчалик қийинлигини яхши биламан. Бу ҳолатнинг қанчалик қийинлигини аёл ва унинг ёстиғи билади холос. Ҳар ой янгиликни кутиш ва қўшимчасига таниш-билишларнинг саволи кўнгилга қанчалик оғир ботишини яхши биламан. Айрим инсонлар бизга “Қонинглар тўғри келмади, ажрашинглар”, деб маслаҳат ҳам берган. Лекин қайнонам бирор марта таъна қилмади, ҳатто ўзим айтмагунимга қадар бу ҳақда сўрагани ҳам йўқ. Яшириниб йиғлаган пайтларим турмуш ўртоғим кулдириб, кайфиятимни кўтаришга уринарди. Худо шукурки, бу синовдан ўтиб, қувончли кунларга ҳам етдик.
Ҳозирги кунда бир йил фарзанд бўлмаса ажрашиб кетадиган оилалар кўп. Оила ўйинчоқ эмас, никоҳ Яратганнинг олдида берилган ваъда ҳисобланади.
Менга ҳам осон бўлгани йўқ. Қийналдим, ҳатто қайнонам билан бирга бола асраб олиш ҳақида ҳам ўйладик. Иккимиз Меҳрибонлик уйидан фарзанд қидиришни бошладик. Турмуш ўртоғим бу гапимни индамай эшитди ва “Менга ўзинг фарзанд дунёга келтириб бер”, дедилар. Бу ҳақда айтиш қанчалик оғир бўлмасин, турмуш ўртоғимга бошқа аёлга уйланишни таклиф қилдим. Чунки турмуш ўртоғим 30 дан ошган, фарзандсизлик оғир ботганидан дўстларига ҳам қўшилмай қўйганди. “Мен сен билан ажрашиш учун оила қурмаганман”, дедилар. “Агар мен билан ажрашишни истамасангиз, майли уйингизда қолиб хизматингизни қиламан. Фақат илтимос уйланинг”, дедим, — дейди актриса Малика Авазова.
Актриса ҳомиласи эгизак эканлигини эшитганида қандай аҳволга тушгани ва турмуш ўртоғи бу янгиликни йиғлаб қарши олгани ҳақида айтди.
— Ўтган йили қиш фаслида театрда кунига тўрт маҳал спектакль қўйдим. Совуқ, иш кўп пайти белим билан йиқилиб тушдим. Ўша пайтда ўзимдаги ўзгаришларни сезиб юргандим. Ультратовуш текширувига борсак келаси ой қайта кўрикка боришим кераклигини айтишди. Қайта текширувга борганимда 4 ҳафталик ҳомиладор эканимни билдим. У пайтдаги аҳволимизни ҳеч бир сўз билан тасвирлаб беролмайман. Турмуш ўртоғим машинани аранг бошқариб уйга келди ва хонамизга кириб, узоқ вақт йиғлади. Ўшанда эркак кишининг йиғлашини биринчи марта кўрдим.
Бола жинсини аниқлаш учун борганимизда, иккита нуқтача борлигини айтишди. Хаёлимга бу бирорта ўсимта бўлса керак, деган фикр келди. “Уни олиб ташлашнинг иложи йўқми, у бола билан бирга ривожланади-ю”, дедим. Шифокор кулиб “Ҳа, нега иккитасини боқолмайсизми?” деди. Ўшанда турмуш ўртоғим билан клиникадан чиқиб, осмонга қараб 15 дақиқа йиғлагандик. Шукурки, сабримизнинг меваси бўлиб эгизак фарзандларимиз дунёга келди, — дейди актриса.
Изоҳ (0)