Facebook асосчиси Марк Цукерберг Гавайида ерости бункерини ўз ичига олган ва озиқ-овқат, энергия манбаларига эга бўлган 100 миллион долларлик улкан мажмуа қурмоқда. Wired нашрининг ёзишича, лойиҳа махфий бўлиб, миллиардер охирзамонга тайёргарлик кўраётганидан далолат беради.
Koolau Ranch номи билан танилган мажмуа аллақачон қисман қурилган ва замонавий тарихдаги энг қиммат шахсий қурилиш лойиҳаларидан бири ҳисобланади. У ўндан ортиқ бинолардан, жумладан, иккита марказий саройдан иборат бўлади, улар беш минг квадрат метрлик ерости бошпанасига олиб борувчи туннел орқали туташиб, зинапоядан кўтарилиш мумкин бўлган фавқулодда чиқиш люкига эга бўлади.
Мажмуада камида 30 та ётоқхона ва 30 та ҳаммом, шунингдек, меҳмон уйлари ва арқонли кўприклар орқали боғланган 11 та “диск шаклидаги” дарахт уйлари бўлади. Ерости бункерининг яшаш майдони, механик хонаси ва “портлашдан ҳимояланган” бетон ва темир эшиги бўлади.
Мажмуадаги барча биноларнинг чиқиш ва кириши тугмачали қулфли ва овоз ўтказмайдиган эшиклар билан жиҳозланади, кутубхонада эса қурилиш ҳужжатларига мувофиқ махфий ёки шовқин ўтказмайдиган эшик бўлади. Бир ишчининг сўзларига кора, камералар аллақачон “ҳамма жойда” ва режаларга кўра, энг кичик бинонинг ўзида 20 дан ортиқ камералар ўрнатилган.
Комплексда Цукербергнинг апокалипсисга тайёрланаётганини кўрсатиши мумкин бўлган яна бир хусусият мавжуд. Қурилиш режаларига кўра, ишчилар мажмуани тўлиқ ўзини-ўзи таъминлашга умид қилмоқда. Диаметри 55 фут ва баландлиги 18 фут бўлган сув резервуари насос тизими билан бирга 1400 гектар ерни фермалар ва қишлоқ хўжалиги озиқ-овқат билан таъминлайдиган майдонга жойлаштирилади.
Цукерберг, шунингдек, мажмуа атрофида олти футлик девор қурдирган ва ўзининг барча пудратчи ишчиларини, уларнинг даражаси ёки иштирокидан қатъий назар, бинолардаги ишларининг махфийлиги тўғрисида шартнома имзолашга мажбур қилган.
Изоҳ (0)