Исроил аскарлари Ғазо секторининг Шежая туманидаги жангда уч нафар гаровга олинган исроилликни “хавф дея адашиб”, отиб ўлдирди. Бу ҳақда Исроил мудофаа кучлари баёнотида айтилади.
Исроил армиясининг маълум қилишича, гаровга олинганларнинг жасади Исроил ҳудудига етказилган.
Ҳарбийлар, шунингдек, ҳалок бўлганлардан икки нафарининг исмини айтди: 7 октябрь куни ҲАМАС томонидан ўғирлаб кетилган Йотам Хайм ва Самер Талалк. Учинчи асирнинг оиласи у ҳақидаги маълумотларни ошкор қилмасликни сўраган.
“Исроил мудофаа кучлари воқеани зудлик билан тергов қилишни бошлади. Исроил армияси бу фаол жанговар ҳудуд экани, сўнгги бир неча кун ичида жанглар давом этаётганини таъкидлайди. Бу воқеадан дарҳол сабоқ олинди ва у ердаги барча қўшинларга етказилди”, — дейилади баёнотда.
24 ноябрь куни Исроил мудофаа кучлари Ғазо секторида ҲАМАС билан урушда вақтинчалик сулҳ тузди. Келишув шартларига кўра, ҲАМАС 81 нафар исроиллик ва яна бир қанча фуқароларни озод қилган. Бунинг эвазига Исроил ҳукумати фаластинликларни — жами 210 кишини қамоқдан озод этди. 1 декабрь куни Исроил мудофаа кучлари жанговар ҳаракатлар қайта бошланганини эълон қилди.
Изоҳ (0)