Фарғонада гуруҳбозликда айбланиб MMA жангчиси Ҳумоюн Тўхтамуродов қўлга олигани тўғрисида хабар берилганди. Фарғона вилояти ИИБ томонидан эълон қилинган видеода спортчи қилмишидан пушаймонлигини билдирган.
27 ноябрда спортнинг жанговар тури билан шуғулланган Ҳумоюн Тўхтамуродов гуруҳбозликка интилиб, атрофига турли хил тезкор вазиятга салбий таъсир қилувчи шахсларни йиғиб, Қўқон шаҳрида икки нафар шахсга тан жароҳати етказиб, ҳодиса жойидан яширинган вақтда тезкор ходимлар томонидан ушланган.
Шундан сўнг, ижтимоий тармоқда Тўхтамуродов қўйиб юборилгани, айни вақтда очиқликда юргани ҳақида хабар тарқалди. Вилоят ИИБ томонидан эълон қилинган видеодан кўриш мумкинки, спортчи ҳамон ҳибсда сақланмоқда.
“Тўғриси, ўша кунги бўлган ишдан афсусдаман. Шу кунгача ўтирган бўлсам, ҳар бир дақиқада ўзим учун хулоса чиқардим. Бундан кейин, бу иш қайтарилмайди. Бу ердан чиқиб, ватаним учун хизмат қиламан”, — дейди спортчи.
Ҳумоюн Тўхтамуродовга нисбатан Жиноят кодексининг 277-моддаси (безорилик) 3-қисми билан қамоққа олиш эҳтиёт чораси танланган.
Бир неча кун олдин Фарғона вилоятида “Долзарб 40 кунлик” доирасида ўтказилган тезкор тадбирда гуруҳбозликка алоқадор 25 нафардан ортиқ шахс безорилик устида ушланиб, уларнинг фаолиятига чек қўйилгани тўғрисида хабар берилганди.
Изоҳ (0)