Нью-Йорк—Тошкент рейси маст йўловчи сабаб Санкт-Петербургга қўнишидан Uzbekistan Airways 22 минг доллар зарар кўрди

Uzbekistan Airways’нинг Нью-Йоркдан Тошкентга учаётган самолёти зўравонлик қилган йўловчи туфайли Санкт-Петербургга фавқулодда қўнгани тўғрисида хабар берилганди. ИИВ Транспорт ва туризм объектларида хавфсизликни таъминлаш департаменти самолётнинг мажбурий қўниши оқибатида Uzbekistan Airways қанча зарар кўрганини очиқлади.

Воқеа 11 декабрь куни Тошкент вақти билан 07:35 да HY102 рейсида содир бўлган. Самолёт бортида 32 ёшли Ўзбекистон фуқароси парвоз вақти ёнида бўлган бир литр спиртли ичимликни ичиб, хавфсизлик қоидаларига риоя қилмасдан, йўловчилар тинчлигини бузган.  

Ҳаво кемасининг бутлигини таъминлаш мақсадида Boeing 787 самолёти сардори йўналиш бўйлаб Санкт-Петерубургдаги “Пулково” аэропортига қўнишга қарор қилган. Бортдаги муаммо ҳақида радиоалоқа орқали хабар берилган. Зўравонлик қилган фуқаро полиция ходимлари томонидан рейсдан туширилган.

Таъкидланишича, самолёт “Пулково” аэропортига қўниши натижасида Uzbekistan Airways 22 244 долларга тенг зарар кўрган.

Мазкур ҳолат юзасидан фуқарога нисбатан Ўзбекистон Жиноят кодексининг 277-моддаси (безорилик) 3-қисми билан жиноят иши қўзғатилди. Ҳозирда дастлабки тергов ҳаракатлари олиб борилмоқда.

Октябрь ойида Москвадан Тошкентга учаётган самолётда йўловчи вафот этгани, Москвага учаётган самолёт Тошкентга фавқулодда қўнгани тўғрисида хабар берилганди.