Қорақалпоғистонда ноқонуний йўллар билан кадастр ҳужжатларини расмийлаштириб беришни ваъда қилган бўлим бошлиғи ушланди. Бу ҳақда Бош прокуратура ҳузуридаги департамент хабар берди.
Маълум қилинишича, департаментнинг Қорақалпоғистон Республикаси бошқармаси томонидан ДХХ ва ИИВ ходимлари билан ҳамкорликда тезкор тадбир ўтказилди. Тадбирда Н.З. исмли шахс фуқаро Р.А.нинг Нукус шаҳридаги нотурар биноси кадастр ҳужжатларини танишлари ёрдамида расмийлаштириб бериши эвазига 5 миллион сўмини қўлга киритиб, яна 1,8 миллион сўмни олган вақтида ашёвий далиллар билан ушланган.
Шунингдек, Н.З.нинг кўрсатувига асосан давом этган тадбирда Кадастр агентлигининг Мўйноқ туман бўлими бошлиғи С.А. фуқаро Р.А.нинг нотурар биноси кадастр ҳужжатларини расмийлаштириб бериши эвазига Н.З. орқали қўлга киритган 5 миллион сўмни қайтариб бераётган вақтида ушланиб, ушбу бино кадастр ҳужжатлари ва пул маблағлари ашёвий далил сифатида олинган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Аввалроқ Давлат кадастрлар палатаси Олмалиқ шаҳар филиали бош муҳандиси пора олаётганида ушланганди.
Изоҳ (0)