Ўзбекистоннинг Владивостокдаги Бош консуллиги ходимлари кўмагида Россиянинг Амур вилоятида қийин аҳволга тушиб қолган С.Т. ва унинг икки нафар вояга етмаган фарзанди Ўзбекистонга қайтарилди. Бу ҳақда “Дунё” агентлиги хабар берди.
Маълум қилинишича, Ўзбекистон Бош консуллиги дипломатлари томонидан Амур вилоятида ташкил этилган консуллик сайёр қабули давомида ушбу вилоятнинг Благовешенск шаҳрида вақтинча бўлиб турган 39 ёшли С.Т. икки нафар вояга етмаган фарзанди билан бирга молиявий қийин аҳволга тушиб қолгани сабабли Ўзбекистонга қайтиш учун амалий ёрдам сўраб мурожаат қилган.
Ўрганишлар натижасида, ушбу фуқаро 2018 йил октябрь ойидан бери Россиянинг Амур вилоятида вақтинча ишлаётгани маълум бўлган. С.Т.нинг турмуш ўртоғи 2023 йил октябрь ойида Россия миграция қонунчилигини бузгани сабабли ўрнатилган тартибда Ўзбекистонга депортация қилинган.
Ушбу важлар инобатга олиниб, Ўзбекистон Бош консуллиги томонидан фуқарога кўмак кўрсатишга қарор қилинган. “Меҳр” лойиҳаси фонди маблағлари ҳисобидан С.Т. ва унинг икки нафар фарзандига Ўзбекистонга қайтиши учун 3 та авиачипта сотиб олиб берилган. Бугунги кунда улар соғ-саломат яқинлари бағрига қайтган.
- Бундан олдин Россияга ишлаш учун бориб, вафот этган аёлнинг 9 ёшли қизи Ўзбекистонга қайтарилгани тўғрисида хабар берилганди.
- Мисрда автоҳалокатга учраб, оғир тан жароҳати олган ўзбекистонлик аёл ватанга қайтарилган,
- Россияда эри қамалиб, чақалоғи билан қийин аҳволда қолган аёлга ёрдам кўрсатилган эди.
Изоҳ (0)