“Тошкент халқаро молия маркази 2027 йил бошидан ишга туширилади” — Жамшид Хўжаев

Ўзбекистонда 2027 йил бошидан Тошкент халқаро молия маркази иш бошлайди. Бу ҳақда бош вазир ўринбосари Жамшид Хўжаев 5 май куни Самарқандда ўтаётган Осиё тараққиёт банкининг йиллик йиғилиши доирасидаги учрашувда маълум қилди.

“Дарё” мухбири хабарига кўра, ҳукумат расмийси айни пайтда марказни ташкил этиш ишлари кетётаганини билдирган.

“Бу марказ фаолияти бўйича президент фармони қабул қилинган. Ҳозир конституциявий қонун ишлаб чиқилмоқда. 2027 йил бошига қадар Ўзбекистон тўлиқ фаолият юритадиган халқаро молия марказини ишга туширади. У Англия ва Уэлс ҳуқуқи асосида ишлайди, ўзининг мустақил суди ва тартибга солиш тизимига эга бўлади”, деди бош вазир ўринбосари.

Жамшид Хўжаевнинг айтишича, марказ рақобатбардош солиқ тизимини таклиф этади. Жумладан, инвесторларга корпоратив, дивиденд ва капитал ўсиш солиқларидан узоқ муддатли имтиёзлар берилади. Тузилма қуйидаги молиявий хизматлар платформасини тақдим этади:

• активларни бошқариш;
• капитал бозорлари;
• исломий молия;
• финтеч;
• оилавий офислар.