Актриса Муқаддас Саъдуллаеванинг санъаткор бўлиши ҳеч кимни ажаблантирмаган. Чунки у санъаткорлар оиласида туғилган ва болалиги тасвирга олиш майдончаларида ўтган. Аммо негадир ота-онаси кенжа қизининг актриса бўлишини истамаган. Актриса айни кунда жўшқин ижод билан банд эмас, у асосий эътиборини оиласига бағишлаган.
“Тортинчоқ қизалоқ бўлганман”
Актриса Муқаддас Саъдуллаева ҳам илк ролини болалик чоғида ўйнаган.У актёр ва режиссёр Машраб Кимсанов томонидан суратга олинган “Беш қисмат” фильмида онаси Гулчеҳра Саъдуллаеванинг кенжа қизи ролини ижро этган. Аммо томшабинлар ретро фильмни кўриб, бу болакай Муқаддас Саъдуллаева эканига ишонмаса керак.
— Санъатга болаликдан қизиққанман. Киноларга таклифлар бўларди, аммо рад жавобини берардим. Балки бу феъл-атворимдаги тортинчоқлик билан боғлиқдир. Психологияга ҳам қизиқишим юқори бўлган. Одамларни кузатишни, ўрганишни яхши кўрардим. Оилада уч фарзандмиз: опам, акам ва мен. Мен ота-онамнинг ёшлари улғайган пайтда дунёга келганим учун энг эркатойи эдим. Айниқса дадам раҳматли ер-у, кўкка ишонмасди. Бир куни Instagram орқали бир аёл “Болалигингизда қаттиқ касал бўлгансиз. Дадангиз қўлида кўтариб олиб келган. Мен синглим билан бирга касалхонада даволанаётгандим. Шифокорлар сизни олиб кириб кетишганидан кейин дадангиз йўлакда йиғлаётганини кўрганман”, деб ёзиб қолди. Ҳақиқатан ҳам дадам раҳматли ниҳоятда меҳрибон ота эди. Болалигим билан боғлиқ ширин хотираларим кўп, ҳеч кимдан кам бўлмай улғайганмиз, — дейди Муқаддас Саъдуллаева.
“Ота-онам санъаткор бўлишимни истамаганди”
Актриса илк гонорари билан боғлиқ саволга қуйидагича жавоб берган.
— Илк гонораримни 15-16 ёшимда қозоғистонлик ижодкорларнинг клипида суратга тушиб, олгандим. Ўшанда берган пулларининг бир тийинига ҳам хиёнат қилмай, онамга олиб борганман. Онам роса хурсанд бўлганди. Ундан кейин Ғайрат Усмоновнинг “Ёр-ёр” клипида суратга тушдим. Клип танилишимга катта ҳисса қўшди. 2012 йил “Салом севги, хайр севги” фильмига таклиф этишди. Кўпчилик санъатга бўлган қизиқишим сўнишини кутганди. Чунки психология йўналишини ҳам жондан ортиқ яхши кўрардим. Аммо ролларга киришиб, фильмларим муваффақиятли чиққанидан кейин асосий эътибор санъатга қаратилди. Энг муҳими, бундан ота-онам ҳам хурсанд бўлди.
Санъаткор бўлишни хоҳлардим-у, лекин ота-онам рухсат бермаганди. “Мен ҳам кинода роль ўйнасам қанийди”, дея орзу қилардим. Суратга олиш майдончасига келганимда актёр-актрисаларни кузатиб, роса ҳавас қилганман, — дейди актриса Муқаддас Саъдуллаева.
“Ҳомиладорлигимга қарамай оиламни сақлаб қолишга ҳаракат қилганман”
Актриса фаолияти давомида кўплаб фильмларда суратга тушган. Аммо одамларга унинг ижодидан кўра шахсий ҳаёти кўпроқ қизиқ. Тақдир сабаб, у уч марта оила қурди. Хайриятки, учинчи турмуши унга бахт олиб келди.
Актриса 2014 йил 5 ноябрида актёр Санжар Ғаниевга турмушга чиққанди. Тўй маросими катта шов-шувлар билан ўтган. Аммо орадан кўп вақт ўтмай актриса ота уйига қайтиб келган.
— Бу ҳақида гапиришни истамайман-у, аммо ўша вақтда менга жуда қийин бўлган. Ҳомиладор ҳолимга қарамай оиламни сақлаб қолишга ҳаракат қилганман. Афсуски, мендан кейин иккита қизни ҳам худди шундай тақдир қаршилади, — дейди актриса.
“Сиз Саъдияга нолойиқсиз”
Актриса 2015 йилнинг сентябрь ойида фарзандли бўлди. Аммо қизалоқнинг туғилиши ҳам оилани сақлаб қололмади. Ҳатто, эр-хотин бир-бирига бўлган кескин муносабатини омма олдида ҳам ошкор қилди. Масалан, Санжар Ғаниев ижтимоий тармоққа Саъдия билан бирга тушган суратини жойлаган. Кўпчилик оилага бахт тилаган, айримлар эса улар нега бирга яшамаётганига қизиққан. Шунда Санжар Ғаниев ҳам суҳбатга қўшилиб “Қизини кўрди дегани — оиласига қайтди дегани эмас. Оила йўқ”, дея изоҳ қолдирган. Бу гапдан Муқаддас Саъдулаева қаттиқ ранжиган. “Яшамасликка етарли сабаб ҳам йўқ. Эркак кишида масъулият бўлиши керак. Одам фарзандининг тақдирига бир ўзи курашгани бир тийин. Болам учун шунча курашиб адашибман. Сиз Саъдияга нолойиқсиз”, деб гап-сўзларга нуқта қўйган.
“Кимнингдир оиласини бузишдан қўрққанман”
Кейинчалик актриса интервьюларининг бирида ота-онасидек бахт насиб этишини орзу қилгани, аммо у фарзандини ёлғиз тарбиялашга мажбур бўлгани ҳақида айтиб ўтган.
— Бу ёғига ёлғиз ўтсам керак, деб ўйлагандим. Қизимга қарашга энага ёллаб, ишлашга мажбур бўлдим. Ҳар доим кимнингдир оиласини бузишдан қўрққанман. Қариндошларимиз ёки ҳамкасбларимиз ҳол-аҳвол сўраса ҳам қўрқиб турардим. Чунки тушунмовчилик сабаб одамлар орасида нотўғри гап-сўз тарқалишини ва бир оиланинг тинчини бузишни истамасдим. Ўша вақтда уйланмаган йигитлар ҳам оила қуришни таклиф қилган. Аммо у уларнинг ота-онасининг қарғишига қолишни истамаганман. Шу боис, энди оила қурмасам керак, деб ўйлардим, — дейди актриса Муқаддас Саъдуллаева.
Йигитали Мамажонов билан қандай танишган?
Актриса Муқаддас Саъдуллаева турмуш ўртоғи актёр Йигитали Мамажонов билан 2018 йилда танишган. Уларнинг учрашувига “Ўзимизнинг йигитлар” номли шоу дастури сабаб бўлган. Актриса ўғли Абубакрга ҳомиладор бўлгунига қадар актёр билан оила қурганини яширганди.
— Аёлим билан кўрсатув сьёмкасида танишганмиз. У пайтда менга ҳам, унга ҳам қийин вазият эди. Оилавий ажримдан кейинги руҳий муаммоларни енгиш учун вақт ва руҳий мадад керак. Биз аввалига бир-биримизга руҳий кўмак бериш учун гаплашганмиз. Кейинчалик муносабатларимиз жиддийлашган. Унинг сабрли эканини ва айтган гапимни қонундек қабул қилишини сезганман. Аввалига оила қурганимизни одамлардан яширганмиз, аммо ўғлим туғилиш арафасида ҳаммаси ошкор бўлган, — дейди Йигитали Мамажонов.
“Турмуш қурганимизни сир тутганмиз”
Ижодкорлар оила қуришганини бир йилга яқин оммадан яшириб юрган. Ҳатто, бу ҳақида яқин дўстлари ҳам билмаган.
— Турмуш ўртоғим ҳам менгача икки марта оила қурганди. “Мен аввалги оилаларимни оммадан яширмагандим. Менимча кўз тегди. Шу боис сиз билан бўлган никоҳимизни ҳозирча ҳеч кимга айтмаймиз”, деган. Унинг гапини қонун деб билганим учун оила қурганимизни энг яқин дугонам Шаҳзода Муҳаммедовага ҳам айтмаганман. Ҳомиладор бўлмасимдан аввал бирга ресторанларга борардик. Аммо ҳомиладорлигим сезила бошлагач, ҳатто бирга кўчага ҳам чиқмаганмиз. Баъзан бу ҳолат қачонгача давом этаркин, деб кўп ўйлардим. Туғруқ куним келганида биргаликда туғруқхонага борганмиз. Иккимизни бирга кўриб, кўпчилик ҳайрон қолган. Ўғлим Абубакр дунёга келганидан кейин менга ажойиб сюрприз тайёрлаган. Яъни оила қуриб, фарзандли бўлганимизни оммага ошкор этган. Йиғлаб юборганман, — дейди актриса Муқаддас Саъдуллаева.
“Турмуш ўртоғим шарт қўйди”
Актрисани кўпчилик оила бузғунчилигида айблаган, ҳатто уни хонанда Райҳон билан уриштириш учун иғволар ҳам қилишган.
— Райҳоннинг ижодига аввалдан бефарқ эмасман. Аммо уларнинг ажрашганини мен ҳам ОАВ орқали билганман. Ундан кейин турмуш ўртоғим бошқа қиз билан оила қурган. Мен бир мухлис сифатида оиланинг сақланиб қолишини истардим, аммо пешона экан. Ҳеч ким ажрашиш ниятида уйланмайди. Аёлларда ҳам бундай ният бўлмайди. Турмуш ўртоғим оила қуришимиздан аввал шарт қўйди. “Бошқа актёрлар билан партнёр сифатида суратга тушмайсиз. Ёки мен билан ёки ёлғиз ўзингиз роль ижро этасиз”, деди. Бу инсон оилани қадрлайди, эркаклик бурчини ҳам бажаради.
Бир йили жуда хунук ҳолат бўлган. Монтажда мени номимдан Райҳоннинг шаънини ерга урадиган сўзлар ёзишган. Энг ёмони монтажда расм тепасига Instagram профилимни жойлаб қўйишган. Уни Райҳонга жўнатишган, мендан ранжиб, у ҳам Instagram’га жойлади. Аммо бу иш иғводан бошқа нарса эмасди. Хайриятки кўп ўтмай уни мен ёзмаганим ошкор бўлди. Хонандага нисбатан ҳеч қандай ёмонлигим йўқ, уни ҳамиша ҳурмат қиламан, — дейди актриса Муқаддас Саъдуллаева.
“Эркакнинг шахсий ҳудудини бузманг”
Ижодкорлар оиласи кетма-кет ўғил ва қиз фарзандли бўлишди. Актриса бир неча йилдан буён деярли ижод қилмайди. Фақатгина турмуш ўртоғи билан партнёр сифатида суратга тушади, холос. 2022 йили эса Муқаддас ва Йигиталнинг муносабатларига дарз кетгани ва улар алоҳида яшаётгани маълум бўлди. Актриса турмуш ўртоғининг хонадонидан кетгани ва фарзандларини ёлғиз тарбиялаётгани ҳақида бир неча видеолар жойлади. Йигитали Мамажонов кейинчалик бунинг сабабларини ва Айсанемхон Юсупова билан муносабатлари ҳақида гапирди.
— Ҳар бир актёрнинг ўзига яраша методикаси бор. У ўзи учун муайян ҳолатга кириш учун йўналиш танлаб олади. Айсанемхон билан клиплар, сериаллар орқали танишмиз. Лекин яқинмасмиз. У қиз билан севишиб, муҳаббатни бошдан кечирмадик. Менинг фильмдаги образим Рустам Айсанемхоннинг образини севади. Мен фильмда Рустамга айландим. Сьёмка тугаганидан кейин ҳолатдан чиқдим. Ҳар бир эркакнинг ўз дидидаги аёли бўлади. Айсанемхон менинг дидимдаги қиз эмас. Аёлим жуда қаттиқ рашк қилади. Тўғри, севгани учун рашк қилади, лекин бу менинг ишим, эркак кишимиз биз, тирикчилик сабаби кино. Ишимни яхши кўраман, шунинг учун аёллардан илтимос, эркак кишининг шахсий ҳудудини бузманг.
Оиламиз кучли рашк сабаб ажрим ёқасига келди. Телбаларча бир инсонни севиш — психологик яхши нарса эмас. Бунинг оқибатида фожиалар юз бериши мумкин. Энг енгили оила бузилишига, кейинроқ эса ўлимгача олиб келади. Аёл киши ўзи билиб-билмай, кўнглингизни оғритадиган, нафсониятингизга тегадиган нарсалар гапириб қўядики, шунақа пайтда “Шунча умримни, вақтим, энергиямни шу аёлга сарфлаб келаётганим қанчалик тўғри экан? Бундан кейин ҳаётимни бахшида қилиб, бу инсон билан яшаш тўғримикан, арзимайди-ку бу инсон?” деб ўйлаб қоласиз. Бу фикр секин-аста кучаяверади, кучайганидан кейин яна гапириб қўяди. Айнан мана шундай вазият 7 ой аввал бизнинг оиламизда ҳам бўлган. Рашк, қаттиқ яхши кўриш шахсан менга керак эмас. Жинниларча яхши кўрадиган инсонга сиз бўйин эгиб яшашингиз керак, мен бундай севгига тайёр эмасман. Бу нарса мени безиллатади. Бу дунёда ҳеч бир жонзот ҳақиқий, тубсиз, беғараз севгига арзимайди. Бундай севгига фақат Аллоҳ муносиб. Мени бундай севишлари керак эмас. Аёл киши эрини ҳурмат қилиши керак, — дейди Йигитали Мамажонов.
Муқаддас Саъдуллаева Instagram’да жуда фаол. Уни ижтимоий тармоқда 3,8 миллион киши кузатади. У саҳифасига асосан оилавий мавзудаги контентларни жойлайди.
Изоҳ (0)