“Malibu’си бор, лекин ёлғон ҳужжатлар қилиб, ҳар ой давлатдан ёрдам пули олади”. Сирдарё ҳокимининг ўринбосари ҳудуддаги боқимандалик ҳақида гапирди

Сирдарё вилояти ҳокимининг биринчи ўринбосари Раҳимжон Бобоевнинг айтишича, вилоятнинг Ховос туманида Malibu автомобили бор фуқарога ёрдам пули бериб келинаётгани маълум бўлган. Бу ҳақда “Дарё”га вилоят ҳокимлиги ахборот хизмати хабар берди. 

Расмийларга кўра, ҳоким ўринбосари бу ҳақда Ховос тумани аҳолиси билан мулоқотида гапирган. 

Президентимиз кечаги йиғилишда тўғри айтди, кўп одамлар боқимандаликка ўрганиб қолди. Битта мисол келтираман. Кеча кам таъминланганлик бўйича, ёш бўйича ҳар хил нафақа олувчиларни, ёрдам пули олувчиларни сарҳисоб қилганимизда нафақа олувчиларнинг 109 нафарида шахсий автомобиль борлиги маълум бўлди. Ховос туманида Malibu автомобили бор одам нафақа олар экан. Уйида Malibu’си бор, лекин ёлғон ҳужжатлар қилиб, давлатдан ҳар ой нафақа пулини оляпти. Уялмайди. Худодан ҳам қўрқмайди, — дейди Раҳимжон Бобоев. 

Масъулнинг қўшимча қилишича, у илгари мурожаатчи фуқаронинг розилигини олиш учун мурожаатчига иккита участка берган.

Бўлди, мен розиман деб кетган эди. Лекин мен кетганимдан сўнг, яна мурожаат қилиб келиб, давлатдан яна 3-4 миллион пул ундирибди. Лекин мен унга иккита участка берганман, бугунги кунда унинг ҳар бири 48-50 миллион сўм дейиляпти. Иккитаси 100 миллион бўлади. Мана ноинсофлик. Президентимиз тўғри айтяпти, боқимандалар кўп. Улар бизни алдаяпти. Бировнинг ҳақини биров еяпти, — дейди вилоят ҳокими ўринбосари.

Аввалроқ Қашқадарё вилояти ҳокими Муроджон Азимов мурожаатчи фуқаролардан бирининг хонадонига бориб, меҳнатга лаёқатли, забардаст йигитнинг ишламай, “давлатнинг қўлига қараб ётганига” гувоҳ бўлганини, унинг уйига ҳақиқий муҳтож деган маънода бозор-ўчар қилиб борганидан уялиб кетганини маълум қилганди.