Фарғона ва Навоий вилоятларида келин сепини куёв ва унинг қариндошлари қайтиб бермагани учун МИБ томонидан мажбурий таритибда олиб берилгани ҳақида хабар берилган эди. “Дарё” нашри мазкур ҳолатларда келинга нима учун ва қандай сабаблар билан сепи қайтарилмаганини ўрганди.
Эслатиб ўтамиз, қонунчиликда виндикацион даъво деган тушунча бор (Фуқаролик кодекси 228-модда). Унга кўра, мулкдор ўз мол-мулкини бошқа шахснинг қонунсиз эгалигидан талаб қилиб олишга ҳақли ҳисобланади.
Биринчи ҳолат — Фарғона
Фарғона вилоятида жорий йил августда қурилган никоҳ ҳеч қанча ўтмай келишмовчилик сабабли бузилади ва келин-куёв бошқа-бошқа яшайди. Келин куёвдан сепини қайтаришни талаб қилиб, судга мурожаат қилган ва МИБ орқали эридан 34 турдаги 11 миллион сўмлик мулкларини қайтариб олган.
Мазкур ҳолат билан шуғулланган инспекторлар берган маълумотга кўра, келин-куёв тўйдан кейин 15 кун бирга яшаган.
Тўйдан аввал келин томон куёвга қилган костюм-шим ёқмагани учун ҳам кичик жанжал бўлган. Тўй куни келин куёвни қўлини бир марта тутмагани учун ҳам ўртада келишмовчилик чиққан.
Тўйдан кейин куёв келинни ишидан камчиликлар топиб, жанжал чиқариб турган. Бот-бот келинга кўнгли бўлмаганини айтиб келган. Тўйдан 15 кун ўтиб, келин онасини кўриб келиш учун ота уйига кетган ва шу бўйи қайтиб келмаган.
Куёвнинг ота-онаси келин томон билан гаплашганида келин куёв билан бошқа яшамаслигини айтган. Яраштириш иш бермагач, келин томон сепни олиб кетишга борганда куёв томон қайтармаган.
Куёвнинг ота-онаси келин ҳеч бир сабабсиз уйга кетиб қолгани, тўй учун 10 минг доллар пул сарфлаб қўйганини ва келин томон уни қоплаб бериши кераклигини айтган, — дейди МИБ инспектори.
Иккинчи воқеа — Навоий
Навоий вилояти Кармана туманида эри билан ажрашган келин собиқ турмуш ўртоғининг уйидан ўзига тегишли мулкни олиб кетмоқчи бўлганида унга қаршилик кўрсатилган. Мулкини турмуш ўртоғининг уйидан олиб бериш учун судга мурожаат қилиб, МИБ орқали 27 турдаги мол-мулкларини қайтариб олган.
Мазкур иш билан шуғулланган МИБ инспекторининг айтишича, эр-хотин икки йилдан ортиқ бирга яшаган. Оила бузилишига эрнинг ичкиликка ружу қўйгани сабаб бўлган.
Куёв томонидан нима учун келин сепини бермагани сўралганида, “Сепни бермасам, хотиним қайтиб келиб мен билан бирга яшайди деб ўйлагандим”, дея жавоб берган.
МИБ инспекторларинг “Дарё”га маълум қилишича, юқорида келтирилган мисоллар амалиётда тез-тез учраб туради. Келин ўз сепини олиш учун судга мурожаат қилиш ҳолатлари кўпайган.
Изоҳ (0)