Сурхондарё вилояти ҳокими Улуғбек Қосимовнинг интернетда тарқалган ҳар бир мурожаатга шахсан эътибор қаратиши сурхондарёликларнинг республикага қилаётган мурожаатларининг кескин камайишига олиб келгани маълум бўлди. Бу ҳақда “Дарё”га вилоят ҳокимининг матбуот котиби Муродбек Давлатов гапириб берди.
Ижтимоий тармоқларда вилоят ҳокимининг шахсан ўзи бош-қош бўлаётган гуруҳларимиз бор. Мазкур гуруҳда журналистлар, блогерлар, жамоатчилик вакиллари ва раҳбарлар бирлашган. Вилоят ҳаётига оид ҳар бир муаммо хоҳ у журналист томонидан кўтарилган бўлсин, хоҳ блогер, хоҳ жамоатчилик вакили бўлсин, шахсан вилоят ҳокимининг эътиборига ҳавола қилинади. Ва шахсан вилоят раҳбари томонидан назоратга олиниб, раҳбарларга ечими бўйича топшириқ берилади, — дейди Муродбек Давлатов.
Масъулнинг айтишича, журналист ва блогерлар томонидан мазкур гуруҳга ташланган ҳар бир масала нафақат назоратга олинади. Унинг ечими бўйича раҳбарларнинг алоҳида ҳисоботи ҳам тингланади.
Ҳар душанба куни одатда ижро интизоми бўйича муҳокама йиғилиши ўтказилади. Мазкур йиғилиш Zoom тарзида бўлиб, унда мурожаатчилар ҳам иштирок этади. Раҳбар муаммога қандай ечим топганини нафақат вилоят раҳбарига, мурожаатчиларга, журналист-блогерларга айтиб, ҳисобот беради, — дейди Сурхондарё ҳокимининг матбуот котиби.
Сурхондарё вилояти ҳокимлиги қабулхона мудири Баҳодир Дониёровнинг қўшимча қилишича, ҳар бир мурожаатга шу тарзда ёндашиш сурхондарёликларнинг республикага қилаётган шикоятларининг 26 мингтага камайишига олиб келган.
Вилоятимиз аҳолининг республика ташкилотларига мурожаатлари сони бўйича Ўзбекистонда иккинчи ўринда турар эди. Муаммоларга шахсан вилоят ҳокимининг эътибор қаратиши, раҳбарларнинг масъулиятни ҳис этиши ва шу тарзда ишлаши 2023 йилнинг ўн ойлик ҳисоб-китобларида республика қилинган мурожаатлар 2022 йилга нисбатан 26 мингтага камайганини кўрсатди, — дейди Баҳодир Дониёров.
Аввалроқ Улуғбек Қосимов муаммоларни кўтариб чиқиб, ҳокимликка яқиндан ёрдам бераётган журналист ва блогерларга миннатдорлик изҳор қилганди.
Изоҳ (0)