Дубайда Польша Сенати аъзоси Ўзбекистон Олий Мажлис Сенати раиси Танзила Норбоева билан бўлиб ўтган мулоқотда экологик муаммоларнинг оқибатларини бартараф этиш йўналишида ҳамкорликда ишлашни таклиф қилган. Бу ҳақда Олий Мажлис Сенати ахборот хизмати хабар бермоқда.
Айтилишича, Танзила Норбоева БААнинг Дубай шаҳрида Европа Иттифоқи парламентлари делегациялари аъзолари билан учрашувлар ўтказган. Унда Польша сенати аъзоси Оролбўйи минтақасида экологик барқарорликни таъминлашда қўшма лойиҳаларни амалга ошириш таклифини билдирган.
“Польша томони Оролбўйи минтақасида экологик барқарорликни таъминлашда Европа Иттифоқининг ижтимоий жамғармаси билан ҳамкорликда қўшма лойиҳаларни амалга ошириш таклифини билдирди. Шунингдек, чўлланиб бораётган ҳудудларда ўрмон массивларини барпо этишда ўзаро тажриба алмашишга келишиб олинди”, — дейилади Сенат ахборотида.
Шунингдек, Австрия парламенти вакиллари қайта тикланадиган энергия манбалари, хусусан, шамол энергиясидан фойдаланиш йўналишида Ўзбекистон билан ҳамкорлик қилишдан манфаатдор эканлигини билдирган. Руминия парламенти вакили билан бўлиб ўтган учрашувда таълим, қишлоқ хўжалиги, илмий тадқиқот йўналишларида ўзаро тажриба алмашиш каби жиҳатларга эътибор қаратиш таъкидланган.
Маълумот учун, БМТ Бош ассамблеяси Орол фожиасини ҳозирги замоннинг глобал экологик муаммоси сифатида тан олган. Иқлим ўзгаришига қарши кураш бўйича Париж келишувини Ўзбекистон ратификация қилган.
Изоҳ (0)