Бугун, 9 декабрь куни “Ўзбекистон 24” телеканалида эфирга узатилган “Менимча” кўрсатувида Ўзбекистонда таълим соҳасига қаратилаётган эътиборга алоҳида тўхталиб, Ўзбекистон президентининг асосий мақсади ўзбек фарзандларининг билимли, бахтли ва бой бўлишига эришиш экани, давлат раҳбарининг тинимсиз меҳнати ана шу мақсад йўлида кечаётгани таъкидланди.
“Таълим соҳасида фарзандларимиз замонавий билим ва кўникмаларни пухта эгаллаши учун энг қулай шароитлар яратишни изчил давом эттирамиз”, — дея президент сўзларидан иқтибос келтирилди кўрсатувда.
Шунингдек, президент энг катта бойлик ақл-заковат, энг катта мерос бу — яхши тарбия эканига эътибор қаратиб, энг катта қашшоқлик билимсизлик эканини таъкидлайди.
“Энг катта бойлик бу — ақл-заковат ва илм, энг катта мерос бу — яхши тарбия, энг катта қашшоқлик бу — билимсизликдир. Тараққиётнинг тамал тоши ҳам, мамлакатни қудратли, миллатни буюк қиладиган куч ҳам бу — илм-фан, таълим ва тарбиядир.
Эртанги кунимиз, Ватанимизнинг ёруғ истиқболи, биринчи навбатда, таълим тизими ва фарзандларимизга бераётган тарбиямиз билан чамбарчас боғлиқ”, — деган Шавкат Мирзиёев.
Бундан ташқари, президентнинг Янги Ўзбекистоннинг мактаб битирувчиси қандай бўлиши кераклиги ҳақидаги фикрлари ҳам келтирилган.
Президент Янги Ўзбекистоннинг бугунги асосий ғояси нимадан иборат эканига эътибор қаратиб, боболарнинг армонларини амалга ошириш барчамиз учун ҳам қарз, ҳам фарз эканини таъкидлайди: “Агар буюк боболаримизнинг руҳини шод қилиб, жадид боболаримиз қилган ишларнинг давомчилари бўлиб, бугунги ғоямизни — Янги Ўзбекистоннинг остонаси мактабдан бошланади, деган улуғ ҳаракатни амалга оширишда белимизни маҳкам боғлаб ҳаракат қилсак, албатта, натижа бўлади”.
Изоҳ (0)