Туркияга келганига 3 кун бўлган ўзбекистонлик қизни мажбурлаб эрга беришмоқчи бўлишгани ҳақида хабарлар тарқалди. Ўзбекистоннинг Истанбул шаҳридаги Бош консулхонаси мазкур ҳолат юзасидан маълумот берди.
Тарқалган хабарларда “Ўзбек аёлларининг ҳуқуқини ҳимоя қилиш” жамиятига 20 ёшли Ўзбекистон фуқароси ёрдам сўраб мурожаат қилиб, ўзига таниш бўлган аёллар унга Туркияда иш бор деб чақиргани, Туркияга келганидан кейин эса уни Туркия фуқаросига мажбурлаб турмушга бергани айтилган.
Мазкур ҳолат 24 октябрь куни тасвирга олинган бўлиб, Истанбул шаҳрида фаолият кўрсатувчи “Ўзбек аёлларининг ҳуқуқини ҳимоя қилиш” жамияти (кейинги ўринларда – жамият)га ёрдам сўраб мурожаат қилган 2003 йилда туғилган, Андижон вилоятида яшовчи I.Ш. исмли қиз билан боғлиқ воқеага алоқадор.
Фуқаро I.Ш. сентябрь ойида ўзига олдиндан таниш бўлган, ҳозирги вақтда Туркия фуқаролигини қабул қилган, 1990 йилда Наманган вилоятида туғилган О.П. исмли аёл билан олдиндан келишган ҳолда Туркия фуқаросига турмушга чиқишга рози бўлган ва Истанбул шаҳрига келган. У ердан Бурдур шаҳрига жўнаб кетган.
Бироқ Бурдур шаҳрида турмуш қуриши лозим бўлган йигит I.Ш.га маъқул келмагани сабабли у турмушга чиқишни рад этган. Шундан сўнг фуқаро I.Ш. ва уни Ўзбекистондан Туркияга самолётда учиб келиш учун чипта харид қилган фуқаро I.П. ўртасида ўзаро жанжал келиб чиққан.
Бош консулхона ва жамият ҳамкорлигида Бурдур шаҳар полиция идорасига мурожаат қилиниб, 23 октябрь куни уни Истанбул шаҳрига қайтаришга муваффақ бўлинди. Фуқаро I.Ш. ҳозирги вақтда фуқаро I.П.га нисбатан даъвоси йўқлигини, шунингдек, бир оз муддат Истанбул шаҳрида қолиб, меҳнат фаолиятини амалга оширмоқчи эканлигини маълум қилган.
Изоҳ (0)