Салвадор ҳукумати Теther USD эмитенти билан биткоинлар эвазига фуқаролик бериш дастурини ишга туширди. Бу ҳақда “РБК” хабар берди.
Дастур номи Adopting El Salvador Freedom Visa Program бўлиб, у мамлакат иқтисодиётига Биткоин (BТC) ёки USDТга 1 миллион доллар сармоя киритиш эвазига Салвадор фуқаролигини олишни назарда тутади. Дастур шартларига кўра, ҳар йили минг киши Салвадорнинг “олтин” визасини олишда иштирок этиши мумкин, уларнинг эгалари кейинчалик мамлакат фуқаролигини олиш учун ариза топшира олади.
Давлат ушбу дастурдан йилига 1 миллиард долларгача даромад олишни режалаштирмоқда ва барча пуллар иқтисодиёт ва маданиятни ривожлантиришга, шунингдек, мамлакатда турмуш даражасини оширишга қаратилган ижтимоий дастурларга йўналтирилади.
2021 йил сентябрь ойида Салвадор криптовалютани тўлов воситаси сифатида эълон қилди ва Биткоин сотиб олишни бошлади. Танганинг сезиларли даражада қадрсизланишига қарамай, Жанубий Америка мамлакати ҳукумати ўз стратегиясига амал қилишда давом этди. 2022 йил ноябрь ойи ўрталарида Салвадор президенти Найиб Букеле мамлакат ҳар куни бир биткоин сотиб олишни бошлашини айтди.
Найиб Букеле узоқ вақтдан бери биткоинга пул тикиб келмоқда ва ушбу криптовалютани фаол равишда тарғиб қилмоқда. Мамлакат аҳолисининг аксарияти ҳукуматнинг криптовалютага сармоя киритиш ҳақидаги қарорини муваффақиятсиз деб ҳисобласа-да, Салвадор Букеле қароридан сўнг доимий равишда қўшимча биткоинлар харид қилмоқда. Ҳозирда мамлакатда 3144 дона биткоин тангалар бор, уларнинг бозор қиймати тахминан 136 миллион долларни ташкил қилади.
Декабрь ойи бошида Найиб Букеле Салвадорнинг биткоинга киритган сармояси тўлиқ ўзини оқлагани, амалга оширилмаган фойда 3 миллион доллардан ошганини маълум қилганди. Унинг сўзларига кўра, Салвадор рақамли активларни сотишни режалаштирмайди ва “узоқ муддатли стратегия”га содиқ қолади.
Изоҳ (0)