Брянскдаги 5-сонли гимназияда ўқувчи қиз отишма содир этгани ҳақида хабар берилганди. Россия Тергов қўмитаси маълумотларига кўра, 14 ёшли қиз мактабга милтиқ олиб келиб, синфдошларига қарата ўт очган. Беш киши жабрланган, яна бир мактаб ўқувчиси олган жароҳатлари туфайли вафот этган. Отишма уюштирган қиз ўз жонига қасд қилди. Жабрланганлар шифохоналарга етказилди.
“РИА Новости”, “ТАСС” ва бошқа ОАВ маълумотларига кўра, отишмани 8-синф ўқувчиси уюштирган. Baza вa Mash Telegram каналлари унинг исмини Алина деб аташди. Қиз отасига тегишли қуролдан ўқ узган, деб ёзади “РИА Новости”. Mash нашрига кўра, у ов милтиғидан фойдаланган.
Baza Telegram канали маълумотларига кўра, Алина биология дарси бошланаётган тўртинчи қаватдаги синфхонага кўтарилиб, синфдошларига қарата ўқ отишни бошлаган. Shot Telegram каналининг хабар беришича, отишма содир бўлган мактабда металл буюмларни аниқловчи ускуналар йўқ.
Отишманинг асосий сабаби сифатида синфдошлар билан можаро кўриб чиқилмоқда, деб хабар берди “ТАСС” ҳуқуқ-тартибот идораларидаги манба. Mash таъкидлашича, Алина бошланғич синф пайтидан бери мактабда ҳақоратланиб келган. Телеканал хабарига кўра, у йигитларга қарата ўқ узган. Отишма ҳақидаги дастлабки хабарларда “РИА Новости” тўрт нафар ўғил боланинг яралангани ҳақида хабар берди.
Отишма оқибатида ҳалок бўлган қиз — 13 ёшли Мария, деб ёзади Baza. Telegram каналларида гимназиядаги отишма лаҳзалари акс этган видеолар тарқалди.
Давлат Думаси депутати Александр Хинштейн мактаб ўқувчиси ўқ узгани айтилаётган қурол суратини эълон қилди. Унинг сўзларига кўра, отишма “Бекас-3” ов милтиғидан амалга оширилган. Депутатнинг фикрича, содир бўлган воқеаларга “ўқотар қурол сақлашга бепарво муносабат” сабаб бўлган.
Ҳозирча Тергов қўмитаси ҳодиса юзасидан қотиллик моддаси бўйича жиноий иш қўзғатди.
Отишма содир этган мактаб ўқувчисининг отаси сўроқ учун олиб кетилди, деб ёзади “ТАСС”. Mash маълумотларига кўра, Алинанинг эгизаги бор — 14 ёшли Даша. У отишма пайтида синфхонада бўлган, унга зарар етмаган.
Изоҳ (0)