“Zo‘rTV” журналисти ва операторини калтаклаган зўравонга ҳукм ўқилди (видео)

Тошкент шаҳрида “Zo‘rTV” журналисти ва оператори калатаклангани, оператор шифохонага тушгани ҳақида хабар берилганди. ОАВ вакиллари фаолиятига тўсиқ қўйган зўравонга суд ҳукми ўқилди. Бу ҳақда судда қатнашган “Дарё” журналисти хабар берди. 

Суд аввалида сўз олган судья Нилуфар Дадабоева суд музокарага ўтганини маълум қилди ва сўзни Тошкент транспорт прокурори Шукрулла Лутфуллаевга берди. 

Прокурор суд терговида судланувчи, “Ўзбекистон темир йўллари” АЖга қарашли “Кўприкқурилиш” трести унитар корхонаси 67-кўприк қурилиш отряди иш бошқарувчиси Нодир Эшниёзовнинг айби тасдиғини топганини айтиб, унга нисбатан Жиноят кодексининг тегишли моддасига кўра, 4 йил муддатга озодликдан маҳрум қилиш жазосини сўради. 

Лекин судланувчининг ўз айбига иқрорлигини, пушаймонлигини инобатга олиб, муқим иш жойига эгалиги, иш жойида яхши таснифланишини ҳисобга олиб, Жиноят кодексининг 72-моддасига кўра, 3 йил муддатга шартли жазо тайинланишини сўрайман, — деди судда айбловчи сифатида сўз олган Лутфуллаев.

Судланувчининг адвокатлари эса Нодир Эшниёзов судда барча айбини тан олса-да, унга қўйилаётган айрим айбловлар судда далиллар билан исботланмагани инобатга олинишини таъкидлаб, судланувчига енгилроқ жазо берилишини сўради. 

Адвокатга кўра, телеканал журналисти ва оператори, шунингдек, уларнинг ёнидаги гувоҳлар ҳам “Ўзбекистон темир йўллари” АЖга қарашли қўриқланадиган объектга рухсатсиз кирган. Бу айбловга жавоб қайтарган журналист Нурзодбек Воҳидов воқеа содир бўлган куни объектга киришдан олдин “Ўзбекистон темир йўллари” АЖнинг ахборот хизматига боғланишга уринганини, аммо жавоб ололмаганини айтди. 

Воқеа 12 август куни содир бўлган. Биз 14 август куни воқеа жойига бордик. Икки кун ичида бизнинг бирорта сўровимизга ахборот хизмати жавоб бермади, — деди журналист. 

Телеканалнинг калтакланган оператори Сардорбек Йўлдошев судда сўз олар экан, калтакланганидан сўнг соғлиғи ёмонлашганини, синган бурнини операция қилдириш учун 15 миллион сўм сўрашганини, ўзи анча вақтгача ишлолмай қолиб, онаси ҳам бетоб бўлиб қолганини айтди. 

Маънавий зарар учун 300 миллион, моддий зарар учун 15 миллион сўм сўрайман, — деди жабрланувчи. 

“Zo‘rTV” канали вакили эса телеканалга етказилган зарар учун 23 миллион 755 минг сўм товон пули талаб қилаётганини очиқлади. 

Жамиятда юриш-туриш қоидаларини қўпол буздим. Буни тан оламан. Лекин Нурзодбекка қўл теккизмадим. Қўпол муомала ҳам қилмадим. Қўпол муомалам ўша ердаги қўриқчиларга нисбатан ишлатилган. Улар менинг шахсий вазиятимни тасвирга олишгани учун қаршилик қилганман. Бундан афсусдаман, пушаймонман ва жабрланувчилардан кечирим сўрайман. Суддан енгилроқ жазо беришни сўрайман, — деди судланувчи Нодир Эшниёзов.

Суд судланувчи Нодир Эшниёзовни Жиноят кодексининг 277-моддаси 3-қисми “а” ва “г” бандларида кўрсатилган жиноятни содир этганликда айбдор деб топиб, унга дастлаб 4 йил муддатга озодликдан маҳрум қилиш жазоси тайинлади. Судланувчига Жиноят кодексининг 72-моддаси қўлланиб, ҳукмнинг шартлилиги эълон қилинди ва айбдорга 2 йиллик синов муддати белгиланди. 

Судланувчидан “Zo‘rTV” канали фойдасига етказилган зарар учун 23 миллион 755 минг 641 сўм маблағ ундирилди.