Украина Ғарб иттифоқчилари билан келишмовчиликлар туфайли қарши ҳужум пайтида сезиларли муваффақиятга эриша олмади. Бу ҳақда Тhе Washington Post хабар берди.
Журналистлар Украина, АҚШ, Европа давлатлари ва Россиядан 30 дан ортиқ юқори мартабали амалдорлар, шунингдек, фронтда жанг қилаётган 20 дан ортиқ зобит ва аскарлар билан суҳбатлашди. Уларга кўра, Америка, Британия ва Украина ҳарбийлари кампания режасини тузиш учун хариталарда саккизта моделлаштирилган ҳарбий уруш ўйинларини ўтказган. Аммо бир нуқтада Америка ва Украина ҳарбийлари ўртасида тактика ва стратегия масалаларида келишмовчиликлар юзага келган.
Пентагон Россия қўшинлари мудофаа чизиғини мустаҳкамлашга улгурмаслиги учун украинларга имкон қадар тезроқ ҳужумга ўтишни тавсия қилган. Бироқ Украина қўмондонлиги кўпроқ қурол олиш ва қўшинларга машқ қилиш учун кўпроқ вақт бериш мақсадида ҳужумни кейинроқ бошлашга туриб олган.
Қўшма Штатлар кучларни бир йўналишда тўплаш орқали Россия мудофаасини ёриб ўтиш имкониятига ишонган. Улар жанубда Азов денгизига тезда етиб боришга ёрдам берадиган битта кучли зарба беришни талаб қилган. Аммо Украина нафақат жанубда, балки Бахмут ҳудудида ҳам бирданига уч йўналишда зарба беришни танлаган.
Ҳужум бошлангандан сўнг, Украина қўмондонлиги катта йўқотишлардан қўрқиб, ҳал қилувчи муваффақиятга уринишни амалга оширишга журъат эта олмаган. АҚШ разведкаси ҳужумнинг муваффақият қозониш эҳтимолини тахминан 50-50 деб баҳолаган.
Мақолада айтилишича, Украина қўмондонлиги томонидан қабул қилинган аксарият қарорлар ортида Украина Қуролли кучлари бош қўмондони Валерий Залужний турган. Шу билан бирга, унинг Бахмут учун курашиш зарурлиги ҳақидаги қарорларини Украина президенти Владимир Зеленский ҳам қўллаб-қувватлаган.
Изоҳ (0)