“Ҳар бирингиз қаҳрамон, фидойисиз”. Қарши тумани ҳокими тадбиркорлар билан мулоқот қилди 

Қашқадарё вилоятининг Қарши тумани ҳокими Зоир Алиқулов ҳудудда фаолият юритувчи тадбиркорлар билан мулоқот қилди. Бу ҳақда “Дарё”га хабар берган туман ҳокимлиги ахборот хизмати раҳбари Тўлқин Турдиевнинг маълумот беришича, мазкур мулоқот Зоир Алиқуловнинг Қарши тумани ҳокими сифатидаги тадбиркорлар билан дастлабки мулоқоти ҳисобланади. 

Хорижий ва экспортёр корхоналар, ёш тадбиркорлар, тадбиркор аёллар ва турли соҳада фаолият юритувчи туманимиздаги ишбилармон фуқаролар билан ўтказилган ушбу учрашув самимий ва натижаларга бой тарзда ўтди, — дейди Тўлқин Турдиев учрашув ҳақида гапирар экан. 

Зоир Алиқулов тадбиркорлар билан суҳбатлашар экан, ҳар бир тадбиркорни куннинг исталган вақтида қабул қилишга тайёрлигини, муаммосини эшитишга шайлигини айтган. 

“Сизларнинг ҳар бирингиз қаҳрамонсиз, фидойисиз”, дея президентимиз бежиз таъкидламайди. Сизнинг меҳнатингиз ортидан қанча тумандошларимизнинг рўзғори бут бўлмоқда. Бугун расмиятчилик учун сизларнинг муаммоларингизни тингламадим. Ҳар бир мурожаатингиз баёнлаштирилади. Ўрганиш натижаларини ўзим ёки масъул ўринбосарларим боғланиб, маълум қиламиз. Ваколатимиз доирасида кўмак кўрсатамиз. Сизлар учун телефоним узлуксиз ишлайди. 24 соат кўмакка шаймиз, — дейди туман раҳбари. 

Қўшимча қилинишича, қабулда тадбиркорлар мурожаатининг ўз вақтида ечим топиши учун масъул белгиланган.

Мурожаатлар шу жойнинг ўзида муҳокама этилиб, тегишли масъулларга қўшимча топшириқлар берилди. Улар бажарилишини назорат қилиш туман ҳокимининг биринчи ўринбосари Ҳасан Турдиевга юкланди, — дейди туман ҳокимининг матбуот котиби Тўлқин Турдиев. 

Ҳокимлик масъулининг қўшимча қилишича, туманда ҳашар йўли билан маҳаллаларнинг ички кўчаларини шағаллаштириш ишлари ҳам бошлаб юборилган. 

Ҳар бир маҳалладаги таъмирталаб ички кўчаларга ҳашар йўли билан кириб бориб, обод қилиб чиқиб кетамиз. Президентимизнинг бугунги бизга юклаган энг муҳим вазифалари халқимиз розилиги ва маҳаллалар ободлигидир, — деган туман раҳбари Зоир Алиқулов ички кўчаларни шағаллаштириш ҳақида гапирар экан.

Яшаб турган маҳалласидаги таъмирталаб йўлларнинг эпақага келаётганидан қувонган аҳоли масъулларга, давлат раҳбарига ташаккур изҳор этмоқда. 

Айтсак ҳеч ким ишонмайди, бир кун ичида қишлоғимиздаги барча муаммолар ҳал этилди, — дейди қилинаётган ишлардан қувонган файзободлик отахон.