Венесуэлада 3 декабрь, якшанба куни референдум бўлиб ўтди, унда иштирокчиларнинг 95 фоизи нефтга бой Эссекибо ҳудудини мамлакатнинг шимоли-шарқий қисмига киритишни маъқуллади, деб ёзади The New York Times мамлакат сайлов комиссиясига таяниб.
Худди шу номдаги дарёнинг ғарбий қисмида жойлашган Эссекибо умумий майдони 160 минг квадрат километр бўлиб, у Гайана давлатининг тўртдан уч қисмини эгаллайди ва ҳозир ушбу мамлакат бошқаруви остида. ХIX аср бошидан буён икки давлат бу ҳудудга эгалик устида баҳслашиб келади.
Венесуэла Миллий сайлов кенгаши президенти Элвис Аморосо маслаҳат референдумида 10,5 миллиондан ортиқ фуқаро иштирок этганини маълум қилди, деб хабар беради El Universal (мамлакат аҳолиси 28 миллионга яқин).
Овоз бериш учун бешта савол қўйилди, уларнинг охиргиси қуйидагича: “Сиз Гайана-Эссекибо штатининг ташкил этилишига, ушбу ҳудуднинг ҳозирги ва келажакдаги аҳолисига Женева конвенциясига мувофиқ фуқаролик ва Венесуэла шахсий гувоҳномасини тақдим этишни ўз ичига олган комплекс хизматларнинг тезкор режаси ишлаб чиқилишига розимисиз?” Иштирокчиларнинг 95,93 фоизи “ҳа”, 4,07 фоизи “йўқ” овозини берган.
Референдум ташаббускори президент Николас Мадуро бўлиб, у овоз бериш натижаларини “демократия учун тўлиқ муваффақият” деб атади. У Каракас Эссекибони қўшиб олиш бўйича бирор чора кўрадими ёки йўқлигига аниқлик киритмади.
Гайана президенти Ирфаан Али Эссекибонинг “ҳар бир квадрат дюйми” унинг мамлакатига тегишли эканини айтди ва ҳудудни ҳимоя қилишга ваъда берди. Расмийлар Халқаро суддан Венесуэланинг минтақани куч билан босиб олиши хавфи туфайли референдумни тўхтатишни сўраган. Суд Каракасни Гайана билан ҳудудий баҳсдаги вазиятни ёмонлаштирадиган ҳаракатлардан тийилишни буюрган, бироқ овоз беришни тақиқлаш ҳақида гап бўлмаган.
Изоҳ (0)