АҚШ Мудофаа вазирлиги 2024 йилда Австралия ҳарбийлари билан биргаликда гипертовушли қуроллар соҳасида тажрибалар ўтказишни режалаштирмоқда.
Бу ҳақда Пентагон раҳбарининг тадқиқот ва ишланмалар бўйича ўринбосари Хайди Шуэ сўзларига асосланиб, Defence News хабар берди.
“Биз Австралияда яна қандай тажрибаларни ўтказиш мумкинлигини аниқлаш учун австралияликлар билан яқиндан ишлаяпмиз”, — деди у.
Унинг сўзларига кўра, 2023 йилда Қўшма Штатлар ва Австралия гипертовушли қуроллар соҳасида ҳамкорликни кучайтирган ва қўшма тажрибалар бу йўналишдаги навбатдаги қадам бўлади.
Қайд этилишича, гипертовушли қуроллар, автоном қурол тизимлари ва квант ҳисоблашлари каби ривожланаётган технологиялар АҚШ-Австралия-Британия хавфсизлик ҳамкорлигининг иккинчи босқичи – АUКUS’нинг асоси ҳисобланади. Аввалроқ АUКUS’нинг биринчи босқичи доирасида иштирокчилар Канберрага ядровий сув ости кемаларини етказиб бериш бўйича ўнлаб йиллар давом этган лойиҳани тақдим этган эди.
Нашрнинг эслатишича, АҚШ ва Австралия 15 йилдан буён гипертовушли самолётлар яратиш соҳасида тадқиқот олиб бормоқда. 2020 йилда мамлакатлар 5 Мах (6125 км/соат) тезликка эриша оладиган ва қирувчи-бомбардимончи самолётлардан учириладиган аниқ ракеталарни яратиш дастурини ишга туширганди.
Изоҳ (0)