Қирғизистон Жогорку Кенеш депутатлари энергетик ичимликларни тақиқловчи қонун лойиҳасининг концепциясини маъқуллади. Бу ҳақда 24.kg хабар берди.
Ижтимоий сиёсат бўйича қўмита йиғилишида “Қирғизистон Республикаси ҳудудига энергетик ичимликларни олиб кириш, ишлаб чиқариш ва сотишни тақиқлаш тўғрисида”ги қонун лойиҳаси кўриб чиқилди. Тақиқ ташаббускори Жогорку Кенеш депутати Улан Бакасов эди. У қонун лойиҳаси фуқаролар саломатлигини муҳофаза қилиш ва энергетик ичимликларни истеъмол қилиш натижасида юзага келадиган оқибатларни камайтиришга қаратилганини айтди.
Унинг сўзларига кўра, энергетик ичимлик таркибида уч стакан кофе ва 14 ош қошиқ шакар мавжуд. Ижтимоий сиёсат бўйича қўмита раиси Винера Раимбачаеванинг айтишича, ўзининг тиббий амалиётида энергетик ичимликлар ичиш натижасида юрак хасталиги ҳолатлари кўп бўлган. У ҳозир қандли диабет билан касалланган болалар кўплигини билдирди.
Соғлиқни сақлаш вазири ўринбосари Бубужан Ариқбоева ҳам энергетик ичимликларнинг зарари ҳақида гапирди. У бундай ичимлик таркибида қирғизлар саломатлигига жиддий хавф туғдирувчи кофеин мавжудлигини айтди. Муҳокама якунлари бўйича депутатлар қонун лойиҳасини биринчи ўқишда қабул қилдилар.
Изоҳ (0)