Сурхондарё вилоятининг Термиз шаҳри ҳокими Ўктам Тўраев “Дарё” журналисти билан суҳбатда шаҳар ва туман ҳокимларининг ваколати белгилаб берилганини, ҳокимлар ваколатида кимгадир топшириқ бериб, тадбиркорни қаматиб юбориш даражасидаги имконият йўқлигини айтди.
Шаҳар ва туман ҳокимларининг ваколатлари белгилаб берилган, биласиз. Ваколатдан четга чиқиб, кимнидир жазолаш, 15 суткага қамаш ҳақида ўй-хаёл ҳам йўқ, ваколат ҳам йўқ. Ундай топшириқ ҳам берилмаган. Ўша кунги йиғилишда шаҳар ободончилиги, чиқиндиларни ўз вақтида олиб кетиш бўйича масала кўтарилди. Бизнинг Telegram’да гуруҳларимиз бор, у ерда маҳаллалардаги еттиликлар томонидан муаммолар ёзиб борилади. Шунингдек, еттилик фаолиятида қандай муаммолар бўлса, ушбу муаммоларни ҳам ёзиб боришади. Шу гуруҳлар орқали ёзилган муаммоларнинг энг кўпи бу маҳаллалардаги чиқиндиларнинг ўз вақтида олиб кетилмаслиги бўлди. Ҳафталаб, ўн кунлаб чиқинди олиб кетилмаслиги аҳолининг ҳақли эътирозига сабаб бўлган. Шундан келиб чиққан ҳолда йиғилишда масъулларга бу муаммони ўрганиб, қонун доирасида чора кўриш бўйича вазифалар қўйилганди. Ҳеч кимни суд қарорисиз қамаб бўлмайди. Қолаверса, ундай топшириқ бўлмаган, — деди Термиз шаҳри ҳокими Ўктам Тўраев журналист саволига жавоб берар экан.
Ҳокимнинг маълумот беришича, тадбиркорни қўллаб-қувватлаш, тадбиркор кўмагида шаҳарни ривожлантириш унинг асосий мақсадларидан бири.
Тадбиркорни қўллаб-қувватлаб, унинг таклиф ва муаммоларини эшитиб ёрдам беришга ҳаракат қиламиз. Ҳаммамизнинг мақсадимиз битта — Термиз шаҳрини ривожлантириб, аҳолининг яшаш тарзини яхшилаш, — дейди ҳоким.
Аввалроқ Сурхондарё вилоятининг Термиз шаҳри ҳокими Ўктам Тўраев ИИБ бошлиғига оғзаки топшириқ бериб, тадбиркорни 15 суткага қаматишга урингани, аммо жамоатчилик эътирози бунга йўл қўймагани хабар берилганди.
“Дарё” журналисти билан суҳбатда бўлган сурхондарёлик тадбиркор, Шуҳрат Шерназаров Термиз шаҳридаги чиқинди контейнерларига ташланган чиқиндини ташиш билан шуғулланувчи “Био техно эко” МЧЖ раҳбари сифатида фаолият юритишини, ҳоким зўравонлиги унинг шахсий кабинетида, йиғилиш пайтида содир бўлганини айтиб берганди.
Ҳоким мени қаматиши ҳақидаги гапидан олдин ёнига чақириб олиб, бўйнимга мушт қўйиб, ташкилот раҳбарларининг олдида итариб юборди. Йиқилиб тушишимга сал қолди, ўзимни ўнглаб олдим, — деганди тадбиркор.
Термиз шаҳар ҳокимлигининг мазкур ҳолатга билдирган дастлабки муносабатида айтилишича, тадбиркорга нисбатан жарима чораси қўлланилган. Мутасаддилар, кенг жамоатчилик фаоллари иштирокида Термиз шаҳри бўйлаб бунёдкорлик ишларининг бориши кўздан кечирилганда, чиқиндихоналардаги тўпланаётган чиқиндилар ўз вақтида олиб кетилмаётгани ҳақида аҳоли томонидан норозилик билдирилган.
Шу боис ўрганиш жараёнидаги мазкур ишларга бевосита масъул ва жавобгар бўлган “Био техно эко” МЧЖ томонидан чиқиндихонадаги чиқиндиларни олиб кетиш ишлари ўз ҳолига ташлаб қўйилгани, ўзига юклатилган вазифаларни мунтазам равишда бажармасдан келаётгани ва шаҳарни ободонлаштириш қоидаларини бузгани сабабли ички ишлар органлари томонидан ҳуқуқий баҳо берилиши сўралган.
Изоҳ (0)