Франция президенти Эммануэл Макрон Исроилнинг ҲАМАС бутунлай йўқ қилинмагунча урушни давом эттириш режасига шубҳа билдирди. Бу ҳақда “РИА Новости” хабар берди.
БМТнинг Дубайдаги иқлим конференцияси (COP28) доирасидаги матбуот анжуманида нутқ сўзлаган Франция раҳбари Исроил ҳукуматини ўз нуқтаи назаридан реалроқ мақсадлар ҳақида ўйлашга чақирди.
“ҲАМАСни бутунлай йўқ қилиш нима ва кимдир бундай нарса амалга ошиши мумкин деб ўйлайдими? Агар шундай бўлса, уруш ўн йил давом этади. Ўйлайманки, биз Исроил ҳукумати ўз мақсади ва якуний ҳолатини аниқроқ белгилаши керак бўлган паллага келдик”, — деди Макрон.
Франция президенти “бутун бир ҳудудни вайрон қилиш ёки барча фуқаролик салоҳиятини бомбардимон қилиш террорчи гуруҳ ҳаракатларига яхши жавоб” эмаслигини таъкидлади.
ҲАМАС ва Исроил ўртасидаги жанговар ҳаракатлардаги бир ҳафталик сулҳни узайтириш бўйича музокаралар тўхтаб қолганидан сўнг, томонлар жангни қайта бошлади. Исроил бош вазири Биньямин Нетаньяху Исроил барча гаровга олинганларни озод қилиш, ҲАМАСни йўқ қилиш ва Ғазо секторидан исроилликлар учун янги таҳдидларнинг олдини олишни кўзлаётганини айтди.
Исроил ва ҲАМАС сулҳнинг бузилишида бир-бирини айбламоқда, бу келишув муддати тугашидан олдин 240 нафар фаластинлик асир эвазига 80 нафар исроиллик гаровга олинганларни озод қилишга имкон берди. Ҳарбий ҳаракатлар қайта бошланганидан кейин Макрон “узоқ муддатли ўт очишни тўхтатишга эришиш учун саъй-ҳаракатларни кучайтириш” зарурлигини айтди.
Изоҳ (0)