Исроилнинг ҲАМАС билан уруши бошланган 7 октябрдан сулҳ тузилган 24 декабргача Ғазода 5,3 мингдан ортиқ бола ҳалок бўлди. Бу ҳақда Бирлашган Миллатлар Ташкилоти Болалар жамғармаси (ЮНИСЕФ) ижрочи директори Кетрин Рассел маълум қилди.
“Бу рақам бедарак йўқолган ва вайроналар остида кўмилиб кетган кўплаб болаларни ўз ичига олмайди”, — деди Рассел.
Унинг сўзларига кўра, ўт очишни тўхтатиш келишуви амал қилган етти кун давомида болаларда тирик қолишга “умид уйғонган”. Аммо ҳарбий ҳаракатлар қайта бошланди. Расселнинг фикрича, агар жанглар аввалгидек кенг кўламли ва шиддатли бўлса, ҳар куни юзлаб болалар қурбон бўлади ва яраланади.
Бундан ташқари, БМТ расмийси минтақага сув, озиқ-овқат, дори-дармон, кўрпа-тўшак ва иссиқ кийим етказиб берилмаса, гуманитар фалокат юзага келиши ҳақида огоҳлантирди.
“Бугунги кунда Ғазо сектори яна болалар учун дунёдаги энг хавфли жойга айланди. Даҳшатли зўравонликдан етти кунлик танаффус қилинганидан сўнг жанглар қайта бошланди. Оқибатда янаям кўпроқ болалар нобуд бўлиши мумкин”, — деди Рассел ўт очишни тўхтатишга чақириб.
Исроил ва ҲАМАС ўртасидаги сулҳ 24 ноябрдан 1 декабрь куни Тошкент вақти билан 10:00 гача амал қилди. Исроил мудофаа кучлари Ғазо секторида жанглар қайта бошлангани ҳақида хабар бериб, ҲАМАСни сулҳни бузганликда айблади.
Изоҳ (0)