Исроил мудофаа кучлари Ғарбий Соҳилдаги Фаластин шаҳарларида рейдлар ўтказмоқда, деб хабар берди WAFA, Al Jazeera ва Аl Mayadeen маҳаллий манбалар ва мухбирларга таяниб.
WAFA маълумотларига кўра, Исроил армияси мамлакат чегарасига яқин жойлашган ал-Бира шаҳрини штурм қилмоқда. Аскарлар аҳоли пункти яқинидаги турар жой биноларида бир неча бор рейдлар ўтказган. Шундай ҳолат Рамаллаҳ шаҳри шимоли-ғарбида жойлашган ал-Мазра ал-Ғарбия қишлоғида ҳам юз бермоқда.
Ал Майадеен мухбири Ятта шаҳрида фаластинликлар ва Исроил армияси ўртасидаги қуролли тўқнашувлар ҳақида хабар берди. Унинг сўзларига кўра, Исроил аскарлари ҳудудни шимол ва жанубдан ўраб олган. Исроил ҳарбийлари Ғарбий Соҳил чегараси яқинида жойлашган Қалқиля шаҳрида ҳам рейд ўтказмоқда.
Al-Jazeera мухбирлари Исроил кучларининг Хеврон шаҳрига бостириб киргани ҳақида хабар бериб, қурбонлар ва ҳибсга олишлар ҳақида маълумот йўқлигини қўшимча қилди. WAFA маълумотларига кўра, Женин шаҳрида бир фаластинлик Исроил ҳарбийлари ҳужумидан яраланган, яна бир киши эса машинада кетаётганида отиб ташланган.
Маълумот учун Иордан дарёсининг Ғарбий Соҳили Фаластин Озодлик Ташкилоти томонидан назорат қилинади. Унинг раҳбари Маҳмуд Аббос — Фаластин президенти. Ушбу ҳудуд пойтахти эса Рамаллаҳ шаҳри.
5 ноябрь куни Исроил Ғарбий Соҳилдаги учта шаҳар – Женин, Наблус ва Тулкармда рейдлар ўтказганди. Ynet нашрининг ёзишича, “Исроил ҳарбийлари ерга яширинган портловчи қурилмаларни аниқлаш ва зарарсизлантиришга уринган”.
Изоҳ (0)