“Хоҳлаган нарсага эришмадик”: Зеленский қарши ҳужум ҳақида маълумот берди

Украина президенти Владимир Зеленский Associated Press агентлигига берган интервьюсида Украинанинг қарши ҳужуми ҳақида маълумот берди. 

Зеленский қарши ҳужум натижаларидан қай даражада қониққани ҳақида гапирди.

“Биз чекинмаяпмиз, бундан мамнунман. Дунёдаги иккинчи армия билан жанг қиляпмиз, мамнунман. Одамларни йўқотмоқдамиз, қониқмайман. Биз хоҳлаган барча қуролларни олмадик, бундан мамнун эмасман, аммо жуда кўп шикоят қила олмайман. Биз тезроқ кўзланган натижаларга эришмоқчи эдик. Шу нуқтаи назардан қараганда, афсуски, биз хоҳлаган нарсага эриша олмадик ва бу ҳақиқат”, — деди сиёсатчи.

Унинг сўзларига кўра, Украина ўз иттифоқчиларидан ўзи учун зарур бўлган барча қуролларни олмаган, қуролли кучлар сонининг чеклангани ҳам тезкор ҳужумга ҳалақит берган.

“Исталган натижаларга тезроқ эришиш учун куч етарли эмас. Аммо бу таслим бўлишимиз керак дегани эмас. Биз қилаётган ишимиздан ишончимиз комил. Ўзимизники бўлган нарсалар учун курашамиз”, — деди Украина раҳбари.

Зеленский Исроилнинг ҲАМАС билан уруши фонида Украинадаги уруш фонга ўтиб кетишидан қўрқиши, чунки бу Ғарб ҳарбий ёрдамининг қисқаришига ҳам олиб келишини айтди. Қурол ва ўқ-дориларнинг доимий тақчиллигини ҳисобга олиб, Украина президенти маҳаллий қурол ишлаб чиқаришни кўпайтиришни Украина учун кейинги энг муҳим қадам деб ҳисоблайди.

Бунинг учун Украина бюджетининг муҳим қисми ажратилган, аммо ҳозирги ишлаб чиқариш ҳажми уруш тўлқинини ўзгартириш учун етарли эмас. Зеленский Ғарб иттифоқчилари, жумладан, АҚШ унга бу мақсадга эришиш учун фойдали кредитлар ва шартномалар таклиф қилишига умид қилмоқда.

“Бу чиқиш йўли”, — деди Зеленский ва Россияни ҳарбий жиҳатдан ўзини ўзи таъминлайдиган Украинадан бошқа ҳеч нарса қўрқитмаслигини айтди.