Самарқанд, Қашқадарё вилоятлари ҳамда Қорақалпоғистон Республикасида қалбаки акциз маркали алкоголь ва тамаки маҳсулотларининг муомалага киритилишига чек қўйилди. Бу ҳақда Бош прокуратура ҳузуридаги департамент хабар берди.
Маълум қилинишича, департаментнинг Самарқанд шаҳар, Дўстлик, Кармана, Сергели ва Паркент тумани бўлимлари томонидан божхона бошқармаси, ИИБ ва солиқ инспкцияси ходимлари билан ҳамкорликда тезкор тадбирлар ўтказилган. Тадбирлар давомида 5 та МЧЖга қарашли савдо дўконларида ҳеч қандай ҳужжатсиз қалбаки акциз маркали алкоголь ва акциз маркасиз таъмаки маҳсулотлари сотувга қўйилгани аниқланиб, ушбу савдо дўконларидан 72 хил турдаги жами 19 722 дона қалбаки акциз маркали алкоголь ҳамда 1 430 қути тамаки маҳсулотлари ашёвий далил сифатида олинган.
Шу каби, департаментнинг Қашқадарё вилоят бошқармаси томонидан ўтказилган тезкор тадбирда “Ш.О.” МЧЖга қарашли савдо дўкони сотувчиси харидорга “Шаҳрисабз” ва “Зелений город” номли қалбаки акциз маркали алкоголь маҳсулотини сотган вақтида ушланиб, ушбу савдо дўконидан 12 хил турдаги 2 111 дона қалбаки акциз маркали алкоголь маҳсулоти ашёвий далил сифатида олинган.
Шунингдек, Тўрткўл туманидаги “Мискин” ЙПХ масканида фуқаро Ж.Х. бошқарувидаги Yutong русумли автобусда қалбаки акциз маркали 1 200 дона “Қаратау” номли алкоголь маҳсулотини Самарқанд вилоятида ўтказиш мақсадида олиб кетаётгани аниқланган. Фуқаро Ж.Х.нинг кўрсатувига асосан давом этган тадбирда фуқаро С.С.нинг хонадонидан қўлбола усулда тайёрланган жами 1 356 дона “Қаратау”, “Актау” ва “Русская водка” номли алкоголь маҳсулоти, 12 литр спирт, 450 дона қалбаки акциз марка ва бошқа товар моддий бойликлари ашёвий далил сифатида олинган.
Мазкур ҳолатлар юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) ва 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда ишлаб чиқариш ёки муомалага киритиш) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Қорақалпоғистон Республикаси ва Фарғона вилоятида қалбаки акциз маркали алкоголь маҳсулотларини муомалага киритилишининг олди олингани тўғрисида хабар берилганди.
Изоҳ (0)