Яқинда UzAutoMotors бешта позициядаги Chevrolet Onix автомобилларининг нархларини оширгани, аммо улар сотувда йўқлиги хабар қилинганди. Компания иловасидан нархлари қимматлашган позициялардан учтаси сотувда пайдо бўлганини кўриш мумкин.
“Chevrolet.uz” сайтидаги янгиланган маълумотларда Onix нархлари 19 фоизгача қимматлашгани очиқланганди. Хусусан, сайтда Chevrolet Onix 4LT LTZ Тurbо АТ нархи 199,9 миллион сўм (эски нарх 185 миллион сўм) кўрсатилганди. Ҳозирда мазкур моделдаги автомобиль сотувда мавжуд.
Шу билан бирга, Chevrolet Onix Premier 1 нархи 207,3 миллион сўмдан 211,9 миллион сўмгача, Chevrolet Onix Premier 2 нархи 214,7 миллион сўмдан 219,6 миллион сўмгача қимматлашгани айтилганди. Айни пайтда ушбу позициялар ҳам сотувда пайдо бўлган.
Нархи ошган, бироқ нисбатан арзонроқ позициялар Onix 1LT МТ (ошган нархи 180,8 миллион сўм) ва Chevrolet Onix LS МТ (ошган нархи 176,9 миллион сўм) сотувга чиқарилмаган.
Компания мазкур бешта позициядаги автомобиллар нархи оширилгани бўйича расмий изоҳ бергани йўқ.
Аввалдан сотувда мавжуд бўлган Chevrolet Onix 3LT МТ 184,8 миллион сўмдан, Chevrolet Onix Premier 2 Тurbо АТ Plus 221,6 миллион сўмдан, Chevrolet Onix Тurbо redline 230,6 миллион сўмдан ҳозир ҳам сотилмоқда.
Аввалроқ иқтисодчи Отабек Бакиров Telegramъдаги каналида нархлар оширилиши юзасидан муносабат билдирган.
“Монополист UzAutoMotors автомобиллар позициялар нархини бу ҳақда расмий хабар бермасдан туриб ошириш йўлини тутганга ўхшайди. Ваколатсиз, бунинг устига раҳбарсиз қолган Рақобат қўмитаси монополистнинг ўзбекистонликлар устидан ўтказишни бошлаган мазкур тажрибасига бирон-бир муносабат билдиргани йўқ. Истеъмолчилар нархлар ошганини олдинги ва компания сайтидаги жорий нархларни солиштирибгина билишларига тўғри келмоқда. Таъкидлаш лозимки, саналган позицияларнинг биронтаси очиқ сотувда йўқ (алоҳида келишиб, топса бўлади)”, — дея фикр билдирган иқтисодчи.
Отабек Бакиров нархлар оширилганига қараганда тез кунда сотувлар бошланишини ҳам тахмин қилганди.
“Октябрьда Chevrolet Onix 3LT МТ позициясининг нархи 26 миллион сўмга оширилгач, 184,8 миллион сўм нарх билан контрактациялар очилганди (2024 йил июнга шартнома тузиш мумкин). Эҳтимолки, нархлари ошган позициялар эртадан сотувда пайдо бўлиб қолиши мумкин. Эсда тутингки, энди Lacetti’дан арзон Onix расман йўқ. Тажрибахонага айлантирилган, бозор дейишга тил бормайдиган танловсиз муҳитимизни Қозоғистон билан солиштиринг. Қардош қўшниларда ўзимизнинг Chevrolet Onix 0 фоиз бадал билан 7 йилга бўлиб тўлашга берилмоқда”, — деб ёзган иқтисодчи.
Жорий йилнинг 26 майида эълон қилинган мақоламизда Onix Premier 1 ва Premier 2 сотуви бошлангани, ўшанда мазкур русумдаги автомобиллар учун 1 минг 171 та навбат мавжудлиги ва машина тайёр бўлишини 1 йил кутиш кераклиги келтирилган.
Маълумотларга кўра, 2023 йилда жами 80 минг дона Onix автомобили ишлаб чиқариш режалаштирилган. Статистика агентлиги хабари беришича, UzAutoMotors жорий йилнинг 9 ойи давомида 22 минг 82 та Onix автомобили ишлаб чиқарган.
Эслатиб ўтамиз, компания Tracker ва Onix 2023 йилдан Spark ва Nexia ўрнига ишлаб чиқарилишини маълум қилган. Onix биринчи марта сотувга чиққан 2022 йил 1 ноябрь куни автомобиль учун рекорд даражадаги — 28 мингдан ортиқ шартнома имзоланган ва навбатлар бир йилгача чўзилганди. Дастлаб Onix 9-12 минг доллар атрофида сотилиши хабар қилинган. Аммо жорий йилнинг май ойи бошида шартномалар тўхтатилгунга қадар автомобиль 18 минг доллардан сотилган.
Изоҳ (0)