Американинг V-22 Osprey ҳарбий самолёти Япония жануби-ғарбидаги орол яқинида қулаб тушди, деб хабар бермоқда Kyodo ва NHK мамлакат қирғоқ қўриқлаш хизматига таяниб.
Самолётда саккиз киши бўлгани тахмин қилинмоқда. Самолёт Кагосима префектураси яқинида денгизга қулаган. Osprey денгиз пиёдалари корпуси ва АҚШ ҳарбий-ҳаво кучлари махсус операциялар қўмондонлигида хизмат қилар эди.
Япония Ер, инфратузилма, транспорт ва туризм вазирлиги маълумотларига кўра, Osprey Ямагучи префектурасида Американинг “Ивакуни” ҳарбий базасидан ҳавога кўтарилиб, Окинавада жойлашган бошқа ҳарбий базага йўл олган. Мудофаа вазирлигининг аниқлик киритишича, учоқ ўз манзилини ўзгартириб, аэропортга кетаётганда ҳалокатга учраган.
2016 йил декабрида бу турдаги самолёт Окинава префектурасининг Наго шаҳридаги қишлоқ яқинидаги саёз сувга фавқулодда қўнган эди. Оқибатда унга жиддий зарар етган, дея аниқлик киритмоқда NHK. Қурбонлар бўлмаган, бироқ префектура аҳолиси “хавотир ва ғазаб” билдиришган.
27 август куни Австралиянинг Мелвилл ороли қирғоқларида Predatorс Тун машқлари чоғида V-22 Osprey самолёти қулаб тушганди. Самолёт бортида 23 нафар денгиз пиёдаси бўлган, улардан беш нафари Дарвиндаги касалхонага ётқизилган. Авария оқибатида уч нафар ҳарбий ҳалок бўлган.
Изоҳ (0)